Zelenov aýdanynda nátıjeli jumyspen qamtýǵa 135 mln teńge bólindi - BQO

Aýdandyq jumyspen qamtý ortalyǵynyń dırektory Vıktor Bashtavenkonyń aıtýynsha, qazirgi tańda osy qarjyǵa tıisti jumystar atqarylýda. 2017 jyly barlyǵy 1368 adamdy memlekettik qoldaý sharalarymen qamtý kózdelse, jeti aıdyń ózinde bul meje 86 paıyzǵa (1 172 adam) oryndalyp otyr. Memlekettik baǵdarlama aıasynda salynyp nemese qaıta qurylyp jatqan nysandarda 132 adam (jospar - 145) jumysqa ornalassa, sonyń 46-sy turaqty ornyn tapty. Áleýmettik jumys oryndaryna 39-dyń ornyna 44, jastar tájirıbesine 29 adam (42) jiberildi. 298 adam (348) qoǵamdyq jumyspen qamtyldy. Sol sekildi 337 adam (377) kásibı biliktiligin kóterdi. Olardyń arasynda kásipkerlik negizderin oqyp-toqyǵandar da bar. Jospardaǵy 20-nyń ornyna 31 adamnyń shaǵyn nesıe alýy da turǵyndardyń kásipkerlikke jappaı bet bura bastaǵandyǵyn kórsetedi. Oǵan qosa memlekettik qoldaý sharalarynsyz kásiporyn-uıymdarda bos jumys oryndary arqyly 348 adam ornalasty.

Aýdandyq jumyspen qamtý jáne áleýmettik baǵdarlamalar bólimi basshysynyń mindetin atqarýshy Galına Jýchkovanyń sózine qaraǵanda, aýdanda barlyǵy 58 987 adam mekendese, sonyń 33 103-i nemese 56,1 paıyzy - ekonomıkalyq turǵydan belsendi turǵyndar. Ár salada 31 199 adam eńbek etse, sonyń 6 823-i - ózin-ózi jumyspen qamtyǵandar. Bul - ekonomıkalyq belsendi halyqtyń 20 paıyzy. Jumyssyzdar - 1 904 adam (5,7 paıyz), az qamtylǵandar - 3 952 adam (7,0 paıyz). Jyl basynan beri 1 541 adam jumysqa ornalasý jóninde ótinish jasaǵan. Jeti aıda 743 jańa jumys orny ashyldy.

Halyqtyń az qamtylǵan bóligin áleýmettik jaǵynan basqalaı da qoldaý sharalary alynýda. Mysaly, quramynda 152 adam bar 36 otbasyna 4 303,4 myń teńge ataýly áleýmettik kómek berildi. 407 otbasyǵa (1 039 bala) 12 698,8 myń teńge kóleminde balalar járdemaqysy tólendi.