Zelenov aýdanynda bıyl áleýmettik salada 3,5 mlrd teńgeniń qurylys jumystary atqarylmaq- BQO
ORAL. QazAqparat - Zelenov aýdanynda bıyl áleýmettik sala nysandaryn salý men jóndeýge, jol qurylysyna 3,5 mlrd teńge jumsalmaq.
Bul týraly oblys ákimi Altaı Kólginovtiń atalmysh aýdanǵa jumys sapary kezinde belgili boldy, dep habarlaıdy «QazAqparat» tilshisi.
Aýdan ortalyǵy Peremetnyı kentinde dene shynyqtyrý-sport kesheni boı kóterýde. Al kezinde Prıýral (keıin Zelenovqa qosylǵan) aýdanynyń ortalyǵy bolǵan Darııan aýylynda 100 oryndyq ınternatymen 300 oryndyq jańa mektep salynýda. Osynda aýyldyq mádenıet úıi de kúrdeli jóndeletin bolady. Volodar aýylynda ortalyq sý qubyry qaıta jańǵyrtylýda (aýdanda 2017 jyly barlyǵy bes eldi meken ortalyqtandyrylǵan sý kózine qosylmaqshy). Óńir basshysy atalmysh nysandarda bolyp, qurylys barysymen tanysty. Oblysta salynyp jatqan bilim ordasynyń biri Darııan aýylyndaǵy qazaq orta mektebi ekeni málim. Ony turǵyzyp jatqan «Otdelstroı» qurylys-kommertsııalyq fırmasy» JShS basshysy Valentına Mıhno mektep qurylysyna (jalpy quny 1 mlrd teńge) bıyl 400 mln teńge bólingenin, ony merziminde aıaqtaý úshin taǵy 200 mln teńge kerektigin jetkizdi. Oblys basshysy tıisti qarjynyń beriletinin, eń bastysy, ony merziminde ıgerip, jumysty sapaly atqarý qajettigin atap kórsetti. Sol sekildi 1976 jyly salynǵan aýyldyq mádenıet úıi kúrdeli jóndeýden ótip qana qoımaı, qazirgi zamanǵy qural-jabdyqtar alynatyn bolady. Oǵan qosa qaraýsyz qalǵan aýyl stadıonyn kelesi jyly qaıta qurý úshin aýdan ákimi Kárim Jaqypovqa jyl sońyna deıin jobalyq-smetalyq qujattama jasaý tapsyryldy.
Aýdanda jol jóndeý jumystary da qyzý júrgizilýde. Peremetnyıda 10, Darııanda 8 kóshege qosa bıyl Oral-Kırsanov avtojolyn jóndeý márege jetetin bolady. Jalpy uzyndyǵy 48 km bul joldyń 32 shaqyrymy 2015-2016 jyldary jóndelgen bolsa, qalǵan 15 shaqyrymyn retke keltirýge bıyl 900 mln teńge bólindi. Merdiger uıym «Birlik» JShS joldy merziminen buryn, qarashada emes, tamyzda bitirýdi kózdep otyr.
«Jol máselesi oblys úshin óte ózekti bolyp otyr. Bıyl Elbasy tapsyrmasyna sáıkes «Nurly jol» baǵdarlamasy aıasynda bul maqsatqa áldeqaıda kóp qarjy bólindi. Aıtalyq, ótken jyly 23 mlrd teńgege 280 km jol jóndelgen bolatyn. Bıyl 470 shaqyrymnan astam joldy jóndeýge 36 mlrd astam teńge qaraldy. Sonyń ishinde 200 shaqyrymnan astamy - respýblıkalyq mańyzy bar joldar. Bıyl Oral-Tasqala-RF shekarasy baǵytyndaǵy joldyń 86 shaqyrymy kúrdeli jóndelip bitedi. Qalǵan 18 shaqyrymy 2018 jyly aıaqtalady. Sonymen qatar shalǵaıdaǵy Qaztalov, Bókeı ordasy, Jánibek aýdandaryna qatqyl tabandy jol tartý oılastyrylýda. Bıyl Jalpaqtaldan ári qaraı Qaztalov baǵytyndaǵy joldyń jobalyq-smetalyq qujattamasy jasalyp, kelesi jyly jóndeý jumysy bastalatyn bolady», dedi Altaı Kólginov.
Óńir basshysy Chınarev kenishin ıgerip jatqan «Jaıyqmunaı» JShS-da da boldy. Munda jyl basynan beri 104 myń tonna munaı jáne 492 mln tekshe metr qurǵaq taýarly gaz óndirilgen. 1991 jyly ashylǵan kenishte qazirgi kezde jylyna 2,5 mlrd tekshe metr gaz óndire alatyn №3 gazdy keshendi daıarlaý qondyrǵysy salynýda.
