«Zeket» qorynyń aımaqtaǵy ókilderi taǵaıyndaldy - QMDB
ASTANA. 14 mamyr. QazAqparat - 2011 jyldyń maýsym aıynda Qazaqstan musylmandary dinı basqarmasy Islam dininiń damýyn órkendetý maqsatynda «Zeket» qoryn qurdy.
«Basty maqsat - shamasy jetetin árbir musylmanǵa paryz bolǵan zeket tólemderin júıeli túrde ortalyqtanǵan shotqa jınap, ony tıisti oryndarǵa, Hanafı mázhabynyń úkimderine saı taratý jumysyn jolǵa qoıý. Sondaı-aq, kadr tapshylyǵyn joıý, shalǵaı aýdandar men aýyldardaǵy ózin-ózi qarajatpen qamtamasyz ete almaı otyrǵan ımamdarǵa jalaqy berý, dinı oqý oryndaryndaǵy stýdentterge shákirtaqy taǵaıyndaý, dástúrli mázhabymyzdy dáripteıtin ádebıetter basyp shyǵarý da qordyń negizgi mindetterine kiredi», - delingen QMDB málimetinde.
Onyń jumysyn jer-jerde jandandyrý úshin Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli «Zeket» qorynyń aımaqtaǵy ókilderin taǵaıyndady. Dinbasy aımaqtan arnaıy kelgen ókilderge zeket týraly, ony halyq ıgiligine jumsaýdyń saýaptary jaıly ýaǵyz aıtty. «Zeket» qory qyzmetkerleriniń jumystaryna sáttilik tilep, batasyn berdi.
