Іzdeýdegi azamattardyń nekesin avtomatty túrde buzatyn norma talqylaýǵa shyqty

ASTANA. KAZINFORM — Syrtqy ister mınıstrligi «Ashyq NQA» portalynda nekeni buzýdyń jańa negizin engizetin qujat jobasyn talqylaýǵa shyǵardy.

Qaıta redaktsııalaýǵa usynylyp otyrǵan qujattyń tolyq ataýy — «Shetelde azamattyq hal aktilerin memlekettik tirkeý salasynda memlekettik qyzmetterdi kórsetý, sondaı-aq azamattyq hal aktilerin tirkeý týraly qaıtalama kýálikter men anyqtamalar berý qaǵıdalaryn bekitý týraly» QR Syrtqy ister mınıstriniń buıryǵy.

Buıryq jobasy Premer-mınıstr Oljas Bektenovtiń 2025 jylǵy 5 tamyzdaǵy jáne 2025 jylǵy 12 tamyzdaǵy ókimderine negizinde ázirlenip otyr.

— Buıryq jobasynyń maqsaty — nekeni buzý salasyndaǵy quqyq qoldaný tájirıbesiniń tıimdiligin arttyrý. Qujatta nekeni buzýdyń jańa negizin engizý usynylady, ol — erli-zaıyptylardyń bireýiniń qylmystyq qýdalaý organynyń halyqaralyq izdeýge jarııalaý týraly qaýlysyna sot sanktsııa bergen kúnnen bastap úsh jyldan astam ýaqyt halyqaralyq izdeýde bolýy, — dep jazylǵan jańa normadan kútiletin nátıje týraly sıpattamada.

Bul normanyń jańashyldyǵy mynada:

Qazir qoldanyp júrgen zańnamada nekeni buzýdyń negizderi mynandaı:

— erli-zaıyptylardyń biriniń qaıtys bolýy nemese qaıtys boldy dep tanylýy,
— habar-osharsyz ketken dep tanylýy,
— sot arqyly taraptardyń biriniń ótinish berýi.

Basqasha aıtsaq, qazir nekedegilerdiń biriniń «halyqaralyq izdeýde bolýy» ajyrasýǵa jeke negiz bolyp eseptelmeıtin.

SІM usynyp otyrǵan jańa norma eger erli-zaıyptylardyń biri qylmystyq qýdalaý organynyń qaýlysyna sáıkes halyqaralyq izdeýge jarııalanyp, bul jaǵdaı sot sanktsııa bergen kúnnen bastap úsh jyldan astam ýaqytqa sozylsa, bul nekeni buzýdyń derbes jańa negizi bolyp sanalady. Buryn nekeni buzý úshin jubaıynyń habar-osharsyz ketkenin dáleldeý nemese jeke bastama boıynsha sotqa talap aryz berý qajet bolatyn. Al jańa negiz naqty qylmystyq is júrgizý mártebesine súıenedi, ıaǵnı, halyqaralyq izdeýde úsh jyldan asa júrgeni avtomatty túrde nekeni buzýǵa zańdy negiz bolmaq.

Osylaısha memleket alǵash ret qylmystyq izdeýde bolýdy otbasy quqyǵynda quqyqtyq saldary bar derbes jaǵdaı retinde bekitpek. Túıindep aıtsaq, jańa norma qylmystyq izdeýde júrgen adamnyń jaryna nekeni buzý protsesin naqty, zańdyq turǵydan jeńildetip beredi.

Buǵan deıin nekeni buzǵan kezde tólenetin memlekettik baj mólsheri artatyny aıtylǵan bolatyn.