Іzdeýde júrgen Aqtaý ákiminiń burynǵy orynbasary Ózbekstanda ustaldy

ASTANA. KAZINFORM – Memleketaralyq izdeýde júrgen Tımýr Sádýaqasov sottan jasyrynbaq bolǵan kezde ustaldy.

Qarjylyq monıtorıng agenttigi habarlaǵandaı, Tımýr Sádýaqasov memlekettik shekarany zańsyz kesip ótý kezinde Ózbekstan Respýblıkasynyń shekara qyzmeti tarapynan ustaldy. Oǵan qatysty Ózbekstan Respýblıkasyna zańsyz kirý faktisi boıynsha qylmystyq is qozǵaldy.

Bar málimetke sáıkes, Sádýaqasov T.H. tergeý ızolıatoryna qamaýǵa alynǵan. Qazirgi ýaqytta ony Ózbekstan Respýblıkasynan ekstradıtsııalaý máselesi boıynsha Bas prokýratýramen birlesip tıisti materıaldar daıyndalyp jatyr.

Eske sala keteıik, Sádýaqasov T.H.-ǵa alaıaqtyq jáne asa iri kólemde para berýge ıtermeleý boıynsha aıyp taǵylǵan.

2023 jyly shilde aıynda Sádýaqasov T.H. jáne «Obýhovskoe» ken ornynda zańsyz paıdaly qazbalar óndirý isine qatysty advokat – Kýrmanbaev S.N. laýazymdy tulǵalar arasyndaǵy baılanystaryn paıdalana otyryp, Dolgalev V.I-qa kásiptegi seriktesterine qarsy qylmystyq is qozǵaýdy usynǵan.

Aldyn ala kelisim boıynsha paranyń birinshi bóligi retinde 90 mln teńge alǵan Sádýaqasov pen Kurmanbaev bul qarajatty ózderi ıemdenip, ýáde etilgen mindettemelerin oryndamaǵan.

Qylmystyq is Pavlodar oblysynyń mamandandyrylǵan aýdanaralyq qylmystyq ister jónindegi sotyna qaıta qaraýǵa joldandy.

Aqtaý ákiminiń burynǵy orynbasaryna izdeý jarııalanǵanyn jazǵan bolatynbyz.