Іzdeýde júrgen 2,5 myń qylmysker ustaldy
2023 jyldyń basynan beri polıtsııanyń jedel ýákilderi 2,5 myń izdeýde júrgen qylmyskerdi ustady, onyń ishinde 34 kisi óltirýshi, 17 qaraqshy, 84 tonaýshy, 10 bopsalaýshy, 11 zorlyqshy, 87 esirtki qylmyskeri bar, dep habarlaıdy Kazinform Polisia.kz-ke silteme jasap.
– Mysaly, osy jyldyń shilde aıynda Shymkentte jedel-izdestirý is-sharalary barysynda bizdiń qyzmetkerler 2018 jyly Dýbaıda kisi óltirgeni úshin izdeýde júrgen er adamdy ustady. Sondaı-aq Tarazda 2022 jyldyń qarasha aıynan bastap Qaraǵandy oblysynyń polıtsııa departamentimen kisi óltirýge oqtalǵany úshin izdeýde júrgen eki azamat quryqtaldy, – dedi QR ІІM krımınaldyq polıtsııa departamenti bastyǵynyń orynbasary Rýslan Nazarov.
Qylmyskerlerdi izdeý tek el aýmaǵymen shektelmeıdi. Іzdestirý jumystary basqa memleketterde de júzege asyrylady. Bul rette Interpoldyń Ulttyq ortalyq bıýrosynyń múmkindikteri keńinen qoldanylady.
Sonymen qatar TMD-ǵa qatysýshy elderdiń aýmaǵynda jylyna eki ret “Іzdestirý” operatsııasy júrgiziledi.
– Elden tys jerlerde jyl basynan beri 70 qylmyskerdi ustap, odan bólek taǵy 36 izdeýde júrgen adamdy anyqtadyq. Olar AQSh, Shvetsııa, Germanııa, Túrkııa, sondaı-aq ózge de alys-jaqyn elderde tabyldy, – dep atap ótti Rýslan Nazarov.
Qazaqstan ІІM jedel-izdestirý toptary shetelde 34 qylmyskerdi ustap, habar-osharsyz ketken bir adamdy tapty. Al Qazaqstan aýmaǵynda basqa memleketterdiń quqyq qorǵaý organdarymen izdeýde júrgen 374 qylmysker tabyldy.
– Máselen, bizdiń jedel-izdestirý tobymyz qarasha aıynda Grýzııa qalalarynyń birinde 2019 jyldyń sáýirinen 2020 jyldyń aqpanyna deıin qarjy pıramıdasyn qurǵan jáne basqarǵan kúdiktini ustady. Ol azamattarǵa 2 mlrd teńgeden astam shyǵyn keltirgen, – dedi spıker.
