Іzdeý jarııalanǵan Dmıtrıı Pýnın men Marına Ilınaǵa qatysty jańa derekter shyqty
ASTANA. KAZINFORM — Qarjylyq monıtorıng agenttigi 1985 jyly 8 aqpan kúni týǵan Reseı Federatsııasynyń azamaty Dmıtrıı Pýnın men 1989 jyly 11 aqpan kúni týǵan Ýkraına azamatshasy Marına Ilınaǵa izdeý jarııalady.
Olarǵa belgilengen bultartpaý sharasy — kúzetpen ustaý.
Olar qazaqstandyq qoldanýshylarǵa baǵyttalǵan Pinco jáne Pin-Up ınternet-kazınolarynyń zańsyz qyzmetin uıymdastyrdy degen kúdikke ilindi.
Tergeý dereginshe, bul shemany iske asyrý úshin baqylaýdaǵy kompanııalardan, tólem uıymdarynan jáne bank quraldarynan turatyn tarmaqtalǵan halyqaralyq ınfraqurylym qurylǵan.
Osy júıeniń Qazaqstandaǵy býyny PIN-UP.KZ brendimen býkmekerlik qyzmetke lıtsenzııa alǵan «Bonamı» JShS boldy. Alaıda zańdy býkmekerlik bıznes ınternet-kazıno qyzmetin jasyrý úshin paıdalanylǵan.
Aqsha aǵynyn qamtamasyz etý úshin satyp alynǵan tólem uıymdary, resmı túrde ǵana basshy sanalatyn adamdar jáne bank termınaldary jelisi paıdalanylǵan. Olardy qosý jáne jumysyn júrgizý qarjy sektory ókilderiniń járdemimen qamtamasyz etilgen.
Nátıjesinde túrli bankter men qarjy uıymdarynda ashylǵan 24 tólem termınalynan turatyn jeli qurylǵan. Onyń 14-i aqsha qabyldaý úshin paıdalanylǵan.
Qarjy operatsııalarynyń kólemi 106 mlrd teńgeden asqan.
— Іzdeý jarııalanǵan adamdardyń qaıda júrgeni týraly qandaı da bir aqparat bilseńiz, Qarjylyq monıtorıng agenttigine myna telefon arqyly habarlaýyńyzdy suraımyz: +7 7172 70 84 78 — kezekshi bólim, — delingen QMA habarlamasynda.
Aıta ketelik Pin-Up-pen sybaılas Dmıtrıı Pýnın men Marına Ilınaǵa izdeý salynǵany týraly jazǵan edik.
