Záıtún maıy jáne sulýlyq syrlary

Teri kútimine tıgizer kómegi kóp. Záıtún quramyndaǵy A, E, B, D, K dárýmenderi - naǵyz sulýlyq bulaǵy ispettes. Záıtún maıy terini jumsartyp, qorektendiredi. Ásirese, qurǵaq teri úshin ol - taptyrmas em. Ylǵaldy uzaq ýaqyt ustap turady, teri jasýshalarynyń qaıta qalpyna kelýine sebepshi bolyp, ájimderdiń aldyn alady.

Teri kútimi

Qurǵaq terige erekshe kútim qajet. Mundaıda kómekke záıtún maıy keledi. Loson daıyndaý úshin:

3 as qasyq záıtún maıy

4 as qasyq qııar shyryny

½ shaı qasyq as sodasy

1 shaı qasyq raýshan sýy (rozovaıa voda) kerek.

Bulardyń barlyǵyn jaqsylap aralastyryp, daıyn bolǵan qospany betke jaǵyp, bir mınýttan keıin jyly sýmen jýyńyz. Mundaı losondy úsh kúnnen artyq saqtaýǵa bolmaıdy. Qııar shyryny tez buzylyp ketedi.

Maıly teri úshin záıtún maıy men lımon shyryny qosylǵan loson daıyndańyz. Ol úshin joǵarydaǵy loson quramyndaǵy qııar shyrynynyń ornyna lımon shyrynyn, al as sodasynyń ornyna tuz qosyńyz.

Záıtún maıynan daıyndalatyn terini áldendiretin, qorektendiretin maska maıly teri úshin de, sondaı-aq qurǵaq teri úshin de óte paıdaly. Ol úshin:

1 shaı qasyq záıtún maıy

1 shaı qasyq qaımaq

1 shaı qasyq lımon shyryny

1 shaı qasyq sábiz shyryny

1as qasyq ashytqy kerek.

Barlyǵyn aralastyryp, betińizge jaǵyńyz. 10-15 mınýttan keıin salqyn sýmen jýyńyz.

Kózdiń aınalasyndaǵy názik terini nárlendirip, ondaǵy usaq ájimderdi jazý úshin de záıtún maıyn qoldanyńyz. Ol úshin jylytylǵan maıdy kózdiń aınalasyna jaǵyp, 30 mınýttaı kózińizdi jumyp jatyńyz. Múmkin bolsa, bul protsedýrany kúndelikti keshkisin qaıtalap turǵan durys.

Quramyndaǵy E dárýmeniniń arqasynda záıtún maıy teri jasýshalarynyń qaıta qalpyna kelýine kóp kómek bolady. Osy oraıda teriniń sozylýyn da záıtún maıymen «emdeý» óte tıimdi. Sondyqtan ishtegi (qaryn), keýdedegi, jambastaǵy sozylǵan terini qaıta qalpyna keltirý úshin záıtún maıyn qoldanyńyz. Ol úshin záıtún maıyna 1-2 tamshy lımon ne apelsın maıyn qosyp, sozylǵan terini súrtińiz.

Shash kútimi

Záıtún maıy shashty nárlendirip, ony jibekteıin jumsartyp, jyltyratady.

Basyńyzdy jýar aldynda saýsaqtaryńyzdy záıtún maıyna malyp alyp, 10 mınýttaı bas terisine massaj jasańyz. Al odan keıin basyńyzdy jyly sýmen shaıyp alyp, ádettegideı jýa berińiz.

Shashyńyzdyń kólemin arttyryp, jyltyratqyńyz kelse:

2 as qasyq záıtún maıy

1 jumyrtqa

1 shaı qasyq alma sirkesýy nemese baldy aralastyryp, shashqa jaǵyp, 10 mınýttan keıin jyly sýmen shaıyńyz. Nátıjesi kóńlińizden shyǵady.

Shashtyń ushtanýyn toqtatý úshin oǵan nárlendiretin kompress jasańyz. Bir stakanǵa jylytylǵan záıtún maıyn quıyp, shashtyń ushyn soǵan salyp, 10-15 mınýt otyryńyz. Odan keıin shashtyń ushyn jelke tusyńyzǵa jınańyz. Basyńyzdy jylylap oramalmen orańyz. Jarty saǵattan keıin qalǵan maıdy sýmen shaıyńyz. Mundaı kompresti aptasyna bir ret jasap turý artyq bolmaıdy.