Zaısandyqtar «Nurly jer» baǵdarlamasy boıynsha páterli bolmaq

ÓSKEMEN. QazAqparat - Shyǵys Qazaqstan oblysynyń Zaısan aýdanynda memlekettik baǵdarlama aıasynda 60 páterli eki turǵyn úı salynady, dep habarlaıdy «QazAqparat» HAA tilshisi.

Jańa turǵyn úılerdi jergilikti merdiger uıymdar salýda. Jumystar josparǵa saı júrip jatyr, 2018 jyldyń sáýirine qaraı osy nysandar el ıgiligine tapsyrylady. Jańa úıler úı kezeginde turǵandarǵa beriledi.

Oblys ákimi Danıal Ahmetov aýdanǵa jasaǵan sapary barysynda qurylys alańdaryna bardy. «Halyq sany ósýde, turǵyn úıler qurylysynyń kólemin ulǵaıtý kerek. Ol úshin otandyq ónerkásip bazasyn paıdalaný, jergilikti turǵyndardyń salymdaryn, ásirese «Turǵyn úı qurylys jınaq banki» jelisi boıynsha tartý qajet», - dedi D. Ahmetov.

Ákimniń baspasóz qyzmetiniń habarlaýynsha, turǵyn úı nesıesin alý úshin osyǵan deıin 50 paıyz kólemindegi bastapqy jarnany quıý kerek bolyp kelgen, al endi bul soma 30 paıyzdy quraıdy.