Zaısandaǵy áýejaı qurylysy aıaqtalýǵa taıap qaldy
ÓSKEMEN. KAZINFORM — Shyǵys Qazaqstan oblysynyń shekara shebindegi Zaısan aýdanynda salynyp jatqan jańa áýejaı qurylysynyń jalpy daıyndyǵy 86,6 paıyzǵa jetti.
Áýejaı qurylysy Memleket basshysynyń shekara mańyndaǵy aýmaqtardy damytý jónindegi tapsyrmasy aıasynda júzege asyrylyp jatyr. Paıdalanýǵa berilgennen keıin ol Zaısan aýdanyn Astana, Almaty jáne Óskemen qalalarymen tikeleı áýe qatynasymen baılanystyrady. Al aldaǵy ýaqytta halyqaralyq baǵyttardy, onyń ishinde Qytaıǵa reısterdi ashý josparlanyp otyr.
Qazirgi ýaqytta ushý-qoný jolaǵynyń, rýldeý jolynyń, perronnyń, áýejaı qorshaýynyń, sý burý júıesiniń jáne kireberis avtokólik joldarynyń qurylysy tolyq aıaqtaldy. Sonymen qatar jaryq-sıgnal berý júıesin, ınjenerlik jelilerdi jáne aeronavıgatsııalyq ınfraqurylymdy montajdaý jumystary jalǵasyp keledi.
Qurylysshylar áýejaıdyń jolaýshylardy qabyldaýyna qajetti negizgi nysandardy salýǵa basymdyq berip otyr. Atap aıtqanda, aerovokzal ǵımaraty, komandalyq-dıspetcherlik pýnkt, apattyq-qutqarý kesheni, ákimshilik-turmystyq jáne ınjenerlik nysandardyń qurylysy júrgizilip jatyr. Sonymen qatar jaryq-sıgnal berý jabdyqtary ornatylyp, ınjenerlik jeliler tartylýda, aeronavıgatsııalyq jáne meteorologııalyq ınfraqurylym jasaqtalyp, aýmaqty abattandyrý jumystary qolǵa alynǵan.
— Búginde jobanyń tórtinshi kezeńin iske asyryp jatyrmyz. Bul kezeńge termınaldyń jáne áýejaı aýmaǵyndaǵy barlyq qosymsha ǵımarattardyń qurylysy kiredi. Jobalyq qujattama kezeń-kezeńimen kelip jatqandyqtan, keıbir jumystardy tehnıkalyq sheshimder alynǵan boıda oryndaýǵa týra keledi. Soǵan qaramastan qurylys qarqynyn barynsha jedeldetip jatyrmyz, — deıdi joba jetekshisi Erbol Tájibaev.
Qurylys aıaqtalǵannan keıin jańa áýejaı Zaısan aýdanyna jetý múmkindigin arttyra túspek. Sondaı-aq logıstıkanyń damýyna, týrızmdi órkendetýge jáne ınvestıtsııa tartýǵa qosymsha serpin beredi.
Oblys ákimdiginiń málimetinshe, jobanyń iske asyrylýy turaqty baqylaýda. Qazirgi tańda nysannyń jalpy qurylys daıyndyǵy 86,6 paıyzdy quraıdy. Jańa áýejaıdy bıyl kúzde paıdalanýǵa berý josparlanyp otyr.
Eske salsaq, osyǵan deıin Astana áýejaıynyń qyzmetinen monopolııaǵa qarsy talaptardyń buzylǵany anyqtalǵany habarlanǵan.
