Zaısandaǵy arheologııalyq keshen qorǵandaryna zaqym keldi – ShQO ákimdigi
ÓSKEMEN. KAZINFORM – Zaısan aýdanyndaǵy «Shaǵanoba» arheologııalyq kesheniniń qorǵandaryna zaqym keltirilýi múmkin ekeni týraly áleýmettik jelilerde taraǵan aqparatqa qatysty ShQO ákimdigi jaýap qatty.
Búgin áleýmettik jelide Shyǵys Qazaqstandaǵy saq qorǵandaryna zaqym kelgeni týraly habar tarady. Osyǵan oraı oblys bıligi resmı aqparat taratty.
– 2026 jylǵy 13 qarashada polıtsııa qyzmetkerleri oqıǵa ornyna bardy. Keshen aýmaǵynda qazylǵan shuńqyrlardy «SRS» JShS-ne tıesili tehnıkanyń kómegimen kómý jumystary júrgizilgeni anyqtaldy. Oqıǵa ornyndaǵy azamattardyń kim ekeni anyqtalyp, materıaldar polıtsııada tirkeldi. Sol kúni tarıhı-mádenı murany qorǵaý mamandary, arheolog, ákimdik jáne polıtsııa ókilderi aýmaqty tekserdi. Jer qazý izderi fotoǵa jáne beınege túsirilip, tıisti akt jasaldy, – delingen habarlamada.
Oblys ákimdiginiń dereginshe, qar jamylǵysy qorǵandardyń jaı-kúıi men yqtımal zalal kólemin tolyq anyqtaýǵa múmkindik bermeıdi. 2027 jyldyń kókteminde qosymsha tekserý júrgizilip, qajet bolǵan jaǵdaıda avarııalyq-qutqarý arheologııalyq jumystary uıymdastyrylmaq.
– Oqıǵanyń mán-jaıyna quqyqtyq baǵa berý úshin tekserý materıaldaryn quqyq qorǵaý organdaryna joldaý tapsyryldy. Zańbuzýshylyq anyqtalsa, kináli tulǵalardy jaýapqa tartý sharalary qabyldanady. Zańsyz qazba jumystary men vandalızmniń aldyn alý úshin eskertkishterdi baqylaý kúsheıtilýde, – delingen aqparatta.
Arheologııalyq murany zertteý men saqtaý jumystary Shilikti, Berel, Eleke sazy jáne Aqbaýyrda jınaqtalǵan tájirıbege súıenip jalǵaspaq. «Altyn adam», túrki qaǵanynyń beınesi bar altyn áshekeıler men ejelgi qonystar óńir tarıhynyń qundy aıǵaqtary sanalady.
– Aldaǵy jumysta eskertkishterdi qorǵaýǵa, ǵylymı zertteýlerdi jalǵastyrýǵa, jádigerlerdi qalpyna keltirip, jurtshylyqqa tanystyrýǵa basymdyq beriledi. Jalpy, oblys ákimdigi qorǵandardyń tabıǵı qalpy men tarıhı kelbetin saqtaı otyryp, zamanaýı ashyq aspan astyndaǵy mýzeı keshenin qurý múmkindigin qarastyryp jatyr. Másele kelisý satysynda tur. Bul bastama qundy jádigerlerdi jurtshylyqqa tanystyrýǵa, ǵylymı zertteýlerge jaǵdaı jasaýǵa jáne óńirdiń arheologııalyq murasyn keler urpaqqa tutas jetkizýge baǵyttalǵan, – dep habarlady ákimdikten.
Eske salsaq, osyǵan deıin Almatyda ornalasqan Qaraǵaıly qorymynda saq dáýirine jatatyn jádigerler men adam súıekteri tabylǵany habarlanǵan.