Zaısanda zańsyz ańshylyqqa qatysy bar degen kúdikpen 10 adam ustaldy
ASTANA. KAZINFORM — Shyǵys Qazaqstan oblysynyń Zaısan qalasynda zańsyz ańshylyqqa qatysy bolýy múmkin degen kúdikpen 10 adam ustaldy. Olardyń toǵyzy — shetel azamaty. Qazir oqıǵanyń mán-jaıy tekserilip jatyr. Bul týraly Orman sharýashylyǵy jáne janýarlar dúnıesi komıteti málim etti.
Keshe «Ohotzooprom» kásipornynyń qyzmetkerleri messendjerlerde zańsyz ańshylyq belgileri bolýy múmkin beınejazbalardy anyqtaǵan.
— Beınejazbalardaǵy avtokólikterdiń memlekettik tirkeý nómirleri boıynsha olardyń Shyǵys Qazaqstan oblysynda tirkelgeni boljandy. «Ohotzooprom» qyzmetkerleri jedel túrde qosymsha aqparat jınap, atalǵan kólikterdiń Zaısan qalasynda bolýy múmkin ekenin anyqtady. Alynǵan málimetter tabıǵat qorǵaý polıtsııasyna berildi, — dep habarlady komıtetten.
Sol kúni saǵat 22:10 shamasynda Zaısan qalasynda «Ohotzooprom» ınspektorlary polıtsııa qyzmetkerlerimen birlesip, beınejazbalarǵa qatysy bolýy múmkin úsh jol talǵamaıtyn kólikti toqtatqan.
Tekserý júrgizý úshin 9 shetel azamaty men 1 Qazaqstan azamaty ustalǵan.
28 qazanda atalǵan derek belgilengen tártippen tirkeldi.
Qazirgi ýaqytta atalǵan azamattardyń zańsyz ańshylyqqa qatysy bar-joǵy anyqtalyp jatyr. Quzyretti organdar oqıǵanyń barlyq mán-jaıyn anyqtaý boıynsha tekserý jumystaryn júrgizbek.
Eske sala keteıik, elimizde kúzgi-qysqy ańshylyq maýsymy bastaldy. Endi qarý asynyp, tumsa tabıǵatqa shyǵatyndar kóbeıedi. Alaıda ań aýlaýdyń da óz tártibi men talaby bar. Endeshe, ańshylyqqa kimder shyǵa alady, qandaı erejelerdi bilýi kerek? Agenttik tilshisiniń zertteý maqalasynan oqyńyz.
