Zaısanda salynyp jatqan áýejaıda shilde aıynda alǵashqy ushaq ushyrylmaq
ÓSKEMEN. KAZINFORM — Shyǵys Qazaqstan oblysy Zaısan aýdanynda Memleket basshysy Qasym-Jomart Toqaevtyń tapsyrmasymen salynyp jatqan áýejaı qurylysy aıaqtalýǵa taıaý.
Búgin sol jerde 300-den astam adam jumys istep jatyr. Áýejaı qurylysy 75-80 paıyzǵa aıaqtalǵan.
— Áýeaılaqtyń negizgi bóligi — ushý-qoný jolaǵy, perron jáne rýldeý joly tolyq salyndy. Aerodrom aýmaǵyndaǵy drenaj júıeleri men ınjenerlik kommýnıkatsııalardyń qurylysy da aıaqtaldy. Qazirgi ýaqytta termınal, apattyq-qutqarý qyzmeti ǵımaraty, garajdar jáne janar-jaǵarmaı saqtaý qoımalaryn salý jumystary júrgizilip jatyr, — dep habarlady oblys ákimdiginen.
Shilde aıynda synaq reısi júzege asyrylmaq. Ushý-qoný jolaǵynyń uzyndyǵy 2200 metr, aerovokzaldyń jalpy aýmaǵy 4000 sharshy metr bolady.
Áýejaı iske qosylǵannan keıin Qytaıdyń Úrimshi qalasyna, Altaı aımaǵyna jáne Qanas kóline halyqaralyq reıster ashý josparlanyp otyr.
Sonymen qatar Astana, Almaty jáne Óskemen qalalaryna ishki baǵyttar boıynsha áýe qatynasy jolǵa qoıylady. Áýejaı Bombardier Q400, ATR-72 sekildi óńirlik sanattaǵy áýe kemelerin qabyldaıtyn bolady.
Eske salsaq, osyǵan deıin Almaty áýejaıyna kirý tártibi ózgergeni habarlanǵan.
