Zaısanda káriz jóndeýshiler gazǵa tunshyǵyp, bireýi kóz jumdy
ÓSKEMEN. QazAqparat - Shyǵys Qazaqstan oblysynyń Zaısan qalasynda káriz qudyǵyn jóndep júrgen 3 adam gazǵa tunshyǵyp, bireýi oqıǵa ornynda ajal qushty, dep habarlaıdy QazAqparat tilshisi.
Oblystyq tótenshe jaǵdaılar departamentiniń habarlaýynsha, keleńsiz jaǵdaı 12 maýsym kúni saǵat 15.45-te bolǵan. «Zaısan» kommýnaldyq kópsalaly memlekettik kásipornynyń 3 qyzmetkeri Spambetov kóshesiniń boıyndaǵy turǵyn úıdiń káriz qudyǵyn jóndep jatqanda metan gazy bólingen. 2 metr tereńdikte júrgen qyzmetkerlerdiń birden syrtqa shyǵýy qıyn bolǵan. Saldarynan 1974 jyly týǵan bir qyzmetker sol jerde til tartpaı ketken.
«Marqumnyń qasynda bolǵan 1981 jylǵy kólik júrgizýshi qazir aýrýhanada jatyr. Al 32 jastaǵy dánekerleýshi alǵashqy medıtsınalyq kómek kórsetilgennen keıin úıine jiberildi. Qaıǵyly oqıǵaǵa 3 qyzmetkerdiń de gaztumyldyryq taqpaýy sebep bolǵan. Tótenshe jaǵdaı mamandary metan gazynyń aýadaǵy úlesi 30 paıyzdan asyp, ottegi úlesi 20 paıyzdan kemigen jaǵdaıda adam ómirine qaýip tónetinin eskertedi. Zaısandaǵy jaǵdaıda eńbek qaýipsizdiginiń erejesi buzylǵan», - delingen resmı aqparatta.
