Zaısanda brakonerler ınspektorlarǵa shabýyl jasady
ÓSKEMEN. QazAqparat - Shyǵys Qazaqstannyń Kókpekti aýylyna qarasty Tassaı aýylynyń birneshe turǵyny zańsyz balyq aýlaý kezinde qolǵa túsip, ınspektorlardyń qaıyǵyn aýdaryp jibermek bolǵan, dep habarlaıdy QazAqparat tilshisi.
Balyq ýyldyryq shashatyn maýsym bolǵandyqtan, qazir Zaısan kólinde qarmaq salyp, aý qurýǵa bolmaıdy. Bul tyıymdy elemegen Tassaı aýylynyń birneshe turǵyny reıd barysynda qolǵa túsken. Keshtetip kól aýmaǵyn tekserýge shyqqan 2 ınspektor zańsyz balyq aýlaýshylardyń qarsy shabýylyna tap bolady.
Orman sharýashylyǵy jáne janýarlar dúnıesi komıtetiniń baspasóz qyzmetiniń habarlaýynsha, san basymdyǵyna arqalanǵan brakonerler komıtet ókilderine beıádep sózder aıtyp, doq kórsetken. Tipti eskekpen uryp, qaıyqtaryn aýdaryp tastamaq bolǵan.
Artynsha bul aqparatty oblystyq polıtsııa departamenti de rastady.
«Bul oqıǵa Zaısan kóliniń Bazar ýchaskesinde, 23 sáýirde keshke bolǵan. Brakonerler zańsyz áreketteriniń ústinen túsken ınspektorlardy balaǵattap, kúsh qoldanatyndaryn aıtyp, qarsylyq tanytqan. Kıkiljińge qatysqan turǵyndardyń kim ekeni anyqtaldy. Barlyǵy da Tassaı aýylynyń turǵyndary. Bul is boıynsha jeke tekserý bastaldy. Olardyń ústinen ınspektorlarǵa kúsh kórsetkeni úshin sot aldy tergeý taǵaıyndaldy» - delingen departamenttiń málimetinde.
