Zaısan men Katonqaraǵaıdaǵy jańa áýejaılar qashan ashylady

ASTANA. KAZINFORM – Shyǵys Qazaqstan oblysynyń ákimi Nurymbet Saqtaǵanov Zaısan men Qatonqaraǵaıdaǵy jańa áýejaılar qashan ashylatynyn aıtty. Qazir Zaısandaǵy áýejaı qurylysynyń 66%-y, Katonqaraǵaıdaǵy áýejaıdyń 55%-y jasalǵan.

– Bul nysandarda ushý-qoný jolaqtary men rýldeý joldary salyndy, qazir perrondar men aerovokzaldar qurylysy júrip jatyr. Bul jumystar jyl sońyna deıin aıaqtalady, – dedi Saqtaǵanov OKQ brıfınginde.

Sonymen birge, óńir ákimi tapsyrys berýshi retinde «Qazaeronavıgatsııa» qajetti jabdyqty satyp alý men ornatý jumystaryn júrgizip jatqanyn atap ótti.

– Meniń oıymsha, kelesi týrıstik maýsymnyń basynda, sáýir-mamyr aılarynda osy áýejaılarǵa alǵashqy ushaqtar qona bastaıdy, – dedi ákim.

Ótken jyldan beri Óskemennen Máskeý men Novosıbırskige halyqaralyq áýe reısteri ushady. Kelesi jyly Qytaıǵa áýe baǵytyn ashý josparlanyp otyr.

Aıta keteıik, Bıyl ShQO-da 856 shaqyrym avtojol jóndeldi. «Taldyqorǵan — Óskemen», «Óskemen — Semeı» jobalary aıaqtaldy, «Óskemen — Rahman qaınarlary», «Qalbataý — Maıqapshaǵaı» baǵyttarynda jumystar jalǵasyp jatyr.

Óskemende Ertis jáne Úlbi ózenderinen ótetin eki kópir salynady. Al keler jyldan bastap Úlbi ózeni arqyly ótetin apatty jaǵdaıdaǵy kópirdi rekonstrýktsııalaý bastalady.