Zaısan kólinde balyq aýlaýǵa shyǵyp, habarsyz ketken eki adamnyń denesi tabyldy
ASTANA. KAZINFORM - Shyǵys Qazaqstan oblysynyń Kúrshim aýdanynda Zaısan kóline balyq aýlaýǵa shyǵyp, qaıtyp oralmaǵan 1979 jáne 2001 jyly týǵan eki er adamnyń denesi tabyldy.
QR Tótenshe jaǵdaılar mınıstrligi baspasóz qyzmetiniń abarlaýynsha, 22 qyrkúıekte Balyqshy aýyldyq okrýginiń aýmaǵynda eki er adam Zaısan kóline balyq aýlaýǵa shyǵyp, qaıtyp oralmaǵan.
Tótenshe jaǵdaılar mınıstrliginiń kúshteri men quraldarymen úzdiksiz izdestirý jumystary uıymdastyryldy. Oǵan jergilikti turǵyndar da óz qaıyqtarymen qatysty.
Іzdeý jumystarynyń alǵashqy kúninde jaǵalaýdan 3-4 shaqyrym qashyqtyqta sýǵa batqan qaıyq tabyldy.
29 qyrkúıekte jergilikti turǵyndar 2001 jyly týǵan er adamnyń denesin tapty. Al 30 qyrkúıekte qutqarýshylar 1979 jyly týǵan er adamnyń denesin sýdan alyp shyqty.
Іzdestirý jumystary barysynda TJM qutqarýshylary 63 ret súńgý jumystaryn júrgizdi. Olar jaǵalaý syzyǵy men kóldiń akvatorııasyn, onyń ishinde ushqyshsyz ushý apparattaryn paıdalana otyryp, tekserdi.
-Іzdestirý jumystary aýa raıynyń qolaısyzdyǵyna, qatty jel men sý betindegi tolqynǵa, sondaı-aq tekseriletin akvatorııa aýmaǵynyń úlken bolýyna baılanysty qıyndady. Bul súńgýirlerdiń jumysyna jáne sýdaǵy izdestirý toptarynyń qozǵalysyna aıtarlyqtaı kedergi keltirdi,-delingen habarlamada.
Osyǵan deıin Kaspııde úsh adam mingen qaıyq teńizge aǵyp ketkeni týraly jazdyq.
