Zaısan, Katonqaraǵaı, Kendirli áýejaılaryna qatynaıtyn ushaqtar satyp alynbaq
PARIJ. KAZINFORM — Parıjde IKAO Eýropalyq jáne Soltústik Atlantıkalyq bıýrosynyń (EURNAT-DGCA) azamattyq avıatsııa bas dırektorlarynyń keńesinde QR Kólik mınıstrligi Azamattyq avıatsııa komıtetiniń tóraǵasy Saltanat Tompıevanyń ATR Eýropa men Ortalyq Azııadaǵy satý jónindegi vıtse-prezıdenti Jerom Gaborımen kezdesýi ótti. Bul týraly Kólik mınıstrligi málim etti.
Kezdesý barysynda taraptar óńirlik áýeparkti jańartý salasyndaǵy yntymaqtasty, ATR zamanaýı týrbovıntti áýe kemelerin jetkizý múmkindikterin, sondaı-aq tehnıkalyq qyzmet kórsetý, personaldy oqytý máseleleri talqylandy. Skat áýe kompanııasy bul ushaqtardy qurylysy júrip jatqan úsh jańa Zaısan, Katonqaraǵaı, Kendirli áýejaılaryna reısterdi oryndaý úshin satyp alýdy qarastyrady.
Sondaı-aq kezdesýde turaqty damý jáne otyn tıimdiligin arttyrýǵa jáne kómirtegi izin azaıtýǵa baǵyttalǵan ınnovatsııalyq tehnologııalardy engizý taqyrybyna erekshe nazar aýdaryldy. Kezdesý sońynda taraptar elimizdiń avıatsııa salasyn odan ári damytý aıasynda birlese jumystanýǵa nıet bildirdi.
ATR – 1981 jyly qurylǵan frantsýz-ıtalıandyq avıatsııalyq tehnıka óndirýshisi. Shtab-páteri Týlýzada (Frantsııa) ornalasqan. ATR42 jáne ATR72 týrbovıntti aımaqtyq jolaýshylar ushaqtaryn shyǵarady. Kompanııa aımaqtyq týrbovıntti ushaqtardy (40-tan 74 orynǵa deıin) óndirýde kóshbasshy.
Aıta keteıik, buǵan deıin Kólik mınıstrligi balalarmen ushýǵa qandaı talaptar men jeńildikter usynylatynyn aıtqan edi.