Zaısan aýdanyna gaz tartý maqsatynda 50 mıllıon teńge bólinbek - ShQO
Oblystyq Aqparat ortalyǵynyń habarlaýynsha, Zaısan aýdanynyń ákimi Serik Aqtanov 2019 jyldyń qorytyndysy týraly halyq aldynda baıandama jasady. Esep berý kezdesýi ShQO ákimi Danıal Ahmetovtiń qatysýymen ótken. Aımaq basshysynyń aıtýynsha, turǵyndardyń ótinishine oraı bıyl aýyldarǵa gaz tartýǵa 50 mıllıon teńge bólinedi. Atap aıtqanda, bul Shilikti, Tasbastaý, Jalshy jáne basqa da birqatar eldi mekender.
«Aýdan halqy tıisti qarajattyń qalaı jumsalyp jatqany men atqarylǵan jumystardyń jaı-kúıin únemi baqylap otyrýy qajet. Bul bıýdjet somasy bólinetin qurylys, jol jóndeý syndy jumystardyń sapaly júrgizilýine sebep bolady», - deıdi Danıal Kenjetaıuly.
Serik Aqtanovtyń sózinshe, esepti kezeńniń ekonomıkalyq kórsetkishteri 2018 jylmen salystyrǵanda edáýir joǵary. Ótken jyldyń qorytyndysy boıynsha oblysta áleýmettik-ekonomıkalyq damýdyń ósý dınamıkasy saqtalǵan. Óndirilgen ónim men kórsetilgen qyzmet kólemi 65 mıllıard 260 mıllıon teńgeni qurady. Oblys ekonomıkasyna salynǵan jalpy ınvestıtsııa mólsheri 8 mıllıard 673 teńgege jetken.
Aýdanda muqtaj jandarǵa kómektesýge kóp kóńil bólinýde. 2019 jyly 1173 otbasyǵa, onyń ishinde 427 kópbalaly otbasyna ataýly áleýmettik kómek tóleýge 658 mıllıon teńge jumyldyryldy. Ortasha eseppen ár otbasyna 560-600 myń teńge tólengen.
«Oblys ákiminiń tapsyrmasymen aýdandaǵy aýyldyq okrýgterde turatyn 11 kópbalaly januıa «Paryz» qory arqyly baspanaly boldy. Bıyl Zaısan qalasyndaǵy Boqajanov kóshesinde 30 páterlik turǵyn úı paıdalanýǵa berilmek. Mundaǵy 27 páterde kópbalaly otbasylar qonys toıyn toılaıdy», - dedi Serik Aqtanov.
Zaısandyqtar aýdan jáne oblys basshysyna birqatar máselelerin jetkizdi.
Olar negizinen aýyl sharýashylyǵy salasynda jeke kásibin bastaý úshin jeńildetilgen nesıe alýǵa, áleýmettik qamsyzdandyrýǵa, jol jóndeýge jáne eldi mekenderdi abattandyrýǵa qatysty boldy. ShQO ákimi ár túıtkildi muqııat tyńdap, aldaǵy ýaqytta tıisti sharalardyń qabyldanatynyn aıtty.
