Zaıyrlylyq ustanymy Ata Zańda qalaı naqtylanbaq — Egizbaev

ASTANA. KAZINFORM — Elimizdiń jańa Konstıtýtsııa jobasynda memleket pen dinı birlestikterdiń arajigin naqtylaıtyn normalar engizilmek. Bul týraly Májilis depýtaty Serik Egizbaev «Referendým-2026» aqparattyq alańynda málimdedi.

Depýtattyń aıtýynsha, zaıyrlylyq (sekýlıarızm) qaǵıdaty — bul memlekettiń basqarý júıesi dinı qaǵıdalarǵa emes, quqyqtyq normalarǵa negizdelýi ekendigin atap ótti.

— Bul ustanymnyń tarıhy 1871 jylǵy Parıj kommýnasynan bastaý alady jáne búginde Frantsııa, Germanııa, Túrkııa, tipti kórshiles Qyrǵyzstan sekildi elderdiń konstıtýtsııalyq negizi. Biz onsyz da zaıyrly memleketpiz, alaıda jańa jobada bul uǵym tolyq naqtylandy. Din óz zańdarymen, memleket óz zańdarymen aınalysady, — dedi Serik Egizbaev.

Jańa Konstıtýtsııanyń birneshe babynda (7, 16, 25, 33-baptar) memleket pen din arasyndaǵy qarym-qatynas naqty kórsetilgen. Eń basty jańalyqtyń biri — 7-bapta «din memleketten bólek» degen normanyń belgilenýi. Bul qoldanystaǵy Konstıtýtsııada mundaı deńgeıde aıqyndalmaǵan bolatyn.

Konstıtýtsııanyń 33-babyna sáıkes, Qazaqstan aýmaǵyndaǵy barlyq bilim berý uıymdaryndaǵy oqytý júıesi zaıyrly sıpatqa ıe bolýy tıis. Bul memlekettik mektepter men kolledjderdi dinı ıdeologııadan qorǵaýdyń zańdyq kepili.

Depýtat zaıyrlylyq ustanymy dinge tyıym salý emes, ony memlekettik basqarýdan bólekteý ekenin túsindirdi. Qazirgi tańda respýblıkada 14 dinı oqý orny (ýnıversıtetter men akademııalar) jumys isteıdi, onda 5 myńnan astam stýdent bilim alyp jatyr.

— Eger bul adamnyń jeke ustanymy men tańdaýy bolsa, oǵan tolyq múmkindik beriledi. Dinı oqý oryndary óz aldyna jumys isteı beredi, biraq olar memlekettiń isine aralaspaıdy, — dep túıindedi Májilis depýtaty.

Aıta keteıik, dinniń memleketten bólek bolý ustanymyn saıasattanýshy Áıgerim Ábdirashıtova da, Konstıtýtsııalyq komıssııa múshesi Murat Ábenov te aıtqan bolatyn.