Zaýytbek Turysbekov qandastar qalashyǵynan jer alýdyń tártibin túsindirdi
«Kezdesý barysynda Zaýytbek Turysbekov jınalǵan qandastarǵa Dúnıejúzi qazaqtary qaýymdastyǵynyń Tóraǵasy Elbasy Nursultan Nazarbaevtyń V Quryltaıda bergen tapsyrmalaryn iske asyrý barysy týraly egjeı-tegjeıli habardar etti. Atap aıtqanda, ol Elbasynyń sheteldegi qazaqtardy tarıhı otanyna qaıtarý, qazaqstandyqtardyń áleýmettik qorǵalmaǵan sanattarynyń turǵyn úı problemalaryn sheshý jáne jańa jumys oryndaryn qurý týraly tapsyrmalary qalaı ise asyp jatqanyn baıandady», - dep málim etti baspasóz qyzmetindegiler.
Dúnıejúzi qazaqtary qaýymdastyǵy 3 jyldyń ishinde Aqmola jáne Túrkistan oblystarynda baspanaǵa muqtaj jergilikti turǵyndar men qandastarǵa arnap «Asar» ádisimen kottedj qalashyqtaryn salýǵa kirisken bolatyn.
«Jobanyń biregeıligi jer satyp alýǵa jáne úıler salýǵa memlekettik salymdar talap etilmeıtindiginde. Óıtkeni jer satyp alynyp qoıylǵan, úılerdi jer ıeleriniń ózderi Asar ádisi boıynsha salady. Bul joǵary sapaly turǵyn úıdiń ózindik qunyn aıtarlyqtaı tómendetedi. Jylyjaılar, mal bordaqylaý ortalyǵy jáne kóterme saýda bazarynyń qurylysy boıynsha usynystar aýdıtorııanyń jaǵymdy pikirine ıe boldy. Óıtkeni munyń bári agroqalashyq qurylysyna qatysýshylar men olardyń otbasylaryn jumyspen qamtýǵa baǵyttalǵan», - deıdi qaýymdastyq mamandary.
Qaýymdastyq tóraǵasynyń orynbasary eki óńirdegi ilki joba sátti iske assa, kezekte Pavlodar, Jambyl, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan oblystary turǵanyn da aıtty.
Búginde pılottyq joba aımaqtarynda geodezııalyq zertteýler negizinde jer telimderiniń shekaralary anyqtalyp, joldar men basqa da ınjenerlik jeli ótetin tustar naqtylanǵan. Al kottedjder qurylysy 15 mamyrda bastalǵan bolatyn. Jospar boıynsha, aldaǵy kúzde agroqalashyqtaǵy alǵashqy úıler boı kóterip úlgerýi tıis.
Aqmola oblysynyń Arshaly aýdanynda 196 gektar jer satyp alynǵan. Munda 1282 kottedj salý kózdelip otyr.
«Jerdiń ıeleri negizinen Ózbekstannan kelgen jáne eldiń soltústik aımaqtarynda qalýǵa, turýǵa jáne jumys isteýge nıet bildirgen qandastar», - deıdi joba avtorlary.
Eske salsaq, Dúnıejúzi qazaqtary qaýymdastyǵynyń bastamasymen Aqmola oblysy, Arshaly aýdanyndaǵy qandastarǵa arnalǵan agroqalashyq qurylysy ótken aptada bastaldy.
