Zaýytbek Turysbekov halyqaralyq balalar quryltaıynyń qatysýshylarymen kezdesti
KÓKShETAÝ. QazAqparat – Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov Býrabaıdaǵy «Baldáýren» respýblıkalyq balalar oqý-saýyqtyrý ortalyǵynda «Týǵan jer – altyn besik» taqyrybymen ótip jatqan halyqaralyq balalar quryltaıynyń onynshy aýysymyna qatysýshylarmen kezdesti, dep habarlaıdy QazAqparat tilshisi.
Kezdesýde Zaýytbek Qaýysbekuly qazaq halqynyń ótken-ketken tarıhynan, alys-jaqyn shet elderdegi qandastarymyzdyń turmys-tirshiliginen aqparat berip, taǵlymdy áńgime órbitti.
Ol 1864 jylǵy Sháýeshek kelisiminen bastap halqymyzdyń kóshi-qon taýqymetinen tálimdi derekter keltirdi. Tipti, qazaq halqynyń shyǵý tegi, ornalasý mekeni, sheteldegi qandastarymyzdyń sany, QR Tuńǵysh Prezıdenti – Elbasy N.Nazarbaevtyń bastamasymen týǵan elge kóshý úrdisi, oralman mártebesi, baýyrlarymyzdyń Qazaqstandaǵy úlgili turmysy jaıly qyzyqty maǵlumattar berildi.
«Bizdiń basty qundylyǵymyz – el Táýelsizdigi», – dedi ol sóziniń bir parasynda.
«Ony tuǵyrlandyrý ultymyzdyń mereıin, halyqaralyq abyroıyn kóteredi. Sender «Baldáýrendegi» árbir kúnderińdi mándi ótkizýge tyrysyńdar. Bolashaq sendirdiki. Ýaqyttyń tolqyndy teńizi ulttardy bylaı qoıyp, tutas halyqty jutyp jatqan búgingi jaǵdaıda senderdiń moıyndaryńda zor salmaq bolatynyn este ustaǵaısyńdar. Qazaqstan taǵy da 1 mıllıon qandasymyzdy shaqyrýǵa daıyn. Bul sender qoıǵan kóp suraqtyń birine jaýabym. Senderge «densaýlyqtaryńdy kútińder, bilimdi bolyńdar, kóbeıýimiz kerektigin umytpańdar, ómirde aspańdar, saspańdar, jaman jerdi baspańdar degim keledi»,– dedi Z.Turysbekov.
Qazaq balasy qaı memlekette júrse de, onyń jalǵyzaq Otany bar, ol – Qazaq eli. Bul jaıynda Elbasy Nursultan Nazarbaev ta ataly sózin aıtqan bolatyn. Sharanyń negizgi maqsaty da osy – álemniń ár qıyrynda júrgen qazaq balalaryna ata jurttyń tarıhyn, tamasha dástúrlerin, ádemi ádep-ǵurpyn, áýezdi tilin, mándi mádenıetin tanytý arqyly ulttyq qundylyqtar ulaǵatyn qalyptastyrý.
Eske sala keteıik, osyǵan deıin habarlaǵanymyzdaı Býrabaıdaǵy «Baldáýren» respýblıkalyq balalar oqý-saýyqtyrý ortalyǵynda «Týǵan jer – altyn besik» taqyrybymen halyqaralyq balalar quryltaıynyń onynshy aýysymy ótýde. Oǵan Reseı, Mońǵolııa, Qytaı, Ózbekstan, Qyrǵyzstan, Iran jáne Germanııadan 300-ge jýyq jetkinshek arnaıy kelgen. Ata jurtqa kelgen balalardyń deni óz ortalarynda oqý ozaty jáne túrli daryn ıeleri.
