Zaýyt qajetti mamandardy daıarlaý úshin oqý ortalyǵyn ashty - SQO
PETROPAVL. QazAqparat – Soltústik Qazaqstan oblysyndaǵy iri zaýyttardyń biri ózine qajetti jáne ınvestorlardyń talabynan shyǵatyn bilikti mamandardy daıarlaý úshin oqý ortalyǵyn ashty, dep habarlaıdy QazAqparat tilshisi.
Petropavldaǵy aýyr mashına zaýyty janynan ashylǵan oqý ortalyǵynyń tıimdi tustary kóp. Eń basty strategııalyq maqsaty – kásiporyndy zamanaýı qondyrǵylarda jumys isteı alatyn bilikti mamandarmen qamtamasyz etý.
«Eki baǵytta jumys isteımiz. Onyń alǵashqysy – «Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasy» aıasynda jumyspen qamtý jáne áleýmettik baǵdarlamalar basqarmasy bólgen qarajatqa jumyssyz júrgenderdi oqytý. Budan basqa osy memlekettik baǵdarlama boıynsha zaýyttyń jumysshylaryn shektes mamandyqtarǵa oqytyp shyǵaramyz», - deıdi oqý ortalyǵynyń bastyǵy Tatıana Chepýhına.
Oqý ortalyǵynda qazir Petropavl qalasy jáne Qyzyljar aýdany jumyspen qamtý ortalyqtarynyń joldamasymen 30 shaqty adam elektrgazdánekerleýshi jáne baǵdarlamamen basqarylatyn bildekterdiń operatory mamandyǵyna oqyp jatyr. Budan basqa jumyspen qamtý jáne áleýmettik baǵdarlamalar basqarmasy taǵy 11 adamdy metall syrlaýshy mamandyǵyna oqytý úshin qarajat bólgen. Zaýyt óz jumysshylarynyń arasynan 17 adamǵa biliktiligin arttyrýǵa múmkindik berdi.
«Bizdiń ortalyqta oqytylatyn barlyq mamandyqtar úshin arnaıy oqý baǵdarlamasy jasaldy. Tyńdaýshylarymyzdyń bilimderin baqylap-baǵalaýǵa múmkindik beretin materıaldar ázirlendi. Olarǵa dáris oqıtyn ustazdardy syrttan shaqyrdyq. Kýrstan ótýshilerge zaýyttyń bilikti de tájirıbeli jumysshylarynan 15 tálimger bekitildi. Sondaı-aq olardy qajetti arnaıy formamen de qamtydyq», - deıdi Tatıana Chepýhına.
Jaqynda oqý ortalyǵynyń bir top kýrsantyna saltanatty jaǵdaıda kýálik tabys etildi. Olar emtıhandardan súrinbeı ótip, baǵdarlamamen basqarylatyn bildektiń operatory mamandyǵyn alyp shyqty. Jańa jyl merekesi qarsańynda qysqa merzimdi kýrstan ótken taǵy 40 shaqty adam eńbek naryǵynda suranysqa ıe – elektrgazdánekerleýshi, metall syrlaýshysy mamandyqtaryn meńgergendigi boıynsha kýálik alady.
