Záýresh Battalova: Baspanasy bar adamdy baspanasyzǵa aınaldyrý - qylmys
«Búginde elimizde kóptegen azamattyń baspanasyz júrgenin kórip otyrmyz. Koronavırýs indeti kezinde jaǵdaı odan ary múshkil bola tústi. Jalǵyz ǵana baspanasy bar adamdardy páterinen qalaı aıyrmaqpyz? Qazirgi ýaqytta Qazaqstanda baspanasyzdyq artyp barady. Bıznes nysandar salamyz dep jerin tartyp alǵan kezde azamattar baspanasynan aıyrylady. Ne bolmasa bank kredıtin tóleı almaı páterinen aıyrylyp qalady. Úleskerlik qurylysqa qatysamyn dep baspanasyz qalǵandar da bar. Paıdalýǵa berilgen úıine kirip, artynan odan aıyrylyp qalǵan adamdar da kezdesedi. Bul - aqylǵa syımaıtyn dúnıe. Baspanasy bar adamdy baspanasyzǵa aınaldyrý - qylmys dep sanaımyn. Sondyqtan Qazaqstandaǵy parlamentarızmdi damytý qory turǵyn úı máselesine arnalǵan zańǵa ózgeris engizýdi talap etip otyr. Sol ózgeristerdiń birinde adamdardyń baspanasy bostan bosqa alynbaýy tıistigi kózdelgen», - dedi Záýresh Battalova.
Onyń aıtýynsha, halyqaralyq standartqa sáıkes, balama páter bermeıinshe nemese naryqtyq qunyn ótemeıinshe azamatty baspanasynan májbúrlep shyǵarýǵa bolmaıdy.
«Bul zań jobasyn ótken jyly bastap, osy jyldyń maýsymynda aıaqtaǵan edik. Biraq, koronavırýs indeti ýaqytty uzartyp jiberdi. Degenmen, 1 qyrkúıekte Prezıdent óz Joldaýynda turǵyn úı máseleleri jónindegi zańnamaǵa ózgerister engizýge tapsyrma berdi. Sondyqtan biz osydan eki kún buryn Aqparat jáne qoǵamdyq damý mınıstrligine qarasty komıtetpen kezdesken edik. Olar búginde osy turǵyn úı máselesi jónindegi zańdarǵa ózgerister daıyndaýǵa kiristi. Biz olarmen kelistik, usynystarymyzdy jiberemiz. Dál «bizdiń zańymyz ótsin« demeımiz. Biz ázirlegen zańdaǵy normalar basqa zańdarǵa engizilse de qanaǵattanamyz», - dedi ol.
Al Qazaqstan kommýnıstik halyq partııasy Ortalyq komıtetiniń hatshysy Jambyl Ahmetbekov zań jobasyn Parlament qaraýyna engizý protsedýrasynyń uzaqqa sozylýy múmkin ekendigin aıtady.
«Zań jobasy eń aldymen saraptamaǵa jiberiledi. Oǵan qarajat qajet bolady. Qarajat Úkimet tarapynan bólinýi kerek. Odan keıin oń sheshim qabyldanyp jatsa, zań jobasy Úkimet tarapynan qaralyp, qorytyndysy shyǵyp, Parlamentke túsedi. Bul uzaq ýaqytta talap etetin jumys», - dedi ol.
