Záýlim úılerdi salyp rýhanı jańǵyrmaımyz - Erlan Qoshanov
«Qarqaraly aýdanynyń týmasy, kásipker Nurlan Qaltaev degen azamatty da aıtqym keledi. Ol óziniń týǵan aýyly - Qoıandyda sport alańyn saldy. Óz qarjysyna alǵashqy bolyp aýdanda otbasylyq balalar úıin ashty», - deıdi oblys basshysy.
Erlan Qoshanovtyń aıtýynsha, bir kezderi mektep bitirip ketken jastar qazirgi tańda týǵan aýylyn kóterýge bilek sybana kirisken.
«Taǵy bir jaqsy mysal keltirýge bolady. Máselen, burynǵy synyptastar - túlekter mektep bitirgenimizge 10 jyl, 20 jyl boldy dep, ózderi bas qosyp jatady. Qazir bizdiń kóptegen aýyldarda, eldimekenderimizde bir qýantarlyǵy - olar baıaǵydaı banket jasap, as iship, aıaq bosatyp emes, banketke jumsaıtyn qarjylarymen mektepterge, aýyldaǵy áleýmettik nysandarǵa kómekterin kórsetip, zamanaýı qurylǵylar alyp berýge kúsh salýda. Bul álbette, qýantarlyq jaǵdaı. Meniń oıymsha, sananyń jańǵyrýy degen osy», - deıdi Erlan Qoshanov.
Óńir ákiminiń aıtýynsha, jastardy eshkim de kúshtemegen.
«Ózderiniń nıetterimen aýyldaryna degen kómegin kórsetip jatyr. Men bul Elbasymyzdyń «Rýhanı jańǵyrý» baǵdarlamasyn júzege asyrýdyń naqty kórinisi dep oılaımyn. Záýlim saraılar nemese Qaraǵandynyń ortalyǵynan úlken úıler salyp biz rýhanı jańǵyrmaımyz. Osyndaı azǵantaı ǵana bolsa da ispen, shyn júrekten shyqqan nıetpen bizdiń halqymyz rýhanı jańǵyrady», - deıdi ol.
