Zaýyttar, vokzaldar: ótken aptada óńirlerde qandaı nysandar ashyldy

Memleket basshysy Qasym-Jomart Toqaevtyń tapsyrmalaryn oryndaý aıasynda el óńirlerinde ónerkásiptik áleýetti damytý, kólik jáne turǵyn úı-kommýnaldyq ınfraqurylymdy jańǵyrtý, sondaı-aq azamattardyń ómir súrý sapasyn arttyrý maqsatynda áleýmettik salany damytý boıynsha júıeli jumys júrgizilip jatyr. 

Ónerkásip jáne óndiris

Aqmola oblysynda ınvestıtsııa kólemi 7,4 mlrd teńge bolatyn jańa metallýrgııalyq keshen iske qosyldy.

Rekonstrýktsııalanǵan óndiristik alańda aıyna 2-den 3 myń tonnaǵa deıin qorǵasyn quramdy shıkizatty qaıta óńdeý jolǵa qoıylǵan.

Joba Memleket basshysynyń shıkizattyq baǵyttan tereń óńdeýge jáne qosylǵan quny joǵary ónim shyǵarýǵa kóshý jónindegi tapsyrmalary sheńberinde júzege asyryldy. 

Infraqurylymdy damytý

Almatyda Naýryzbaı jáne Bostandyq aýdandarynyń 15 myńǵa jýyq turǵynyn sýmen qamtamasyz etetin sý qubyry alańyn rekonstrýktsııalaý aıaqtaldy. Joba aıasynda jańa ekinshi kóterilimdegi sorǵy stansasy salyndy, jalpy kólemi 2 myń m3 eki taza sý rezervýary rekonstrýktsııalandy, ınjenerlik jeliler jańartyldy jáne zamanaýı avtomatty baqylaý júıesi engizildi.

Júrgizilgen jańǵyrtý jumystary sý qubyry jelisindegi qysymdy turaqty ustap turýǵa, ásirese sý tutyný kólemi artatyn ýaqytta, sondaı-aq sý berýdegi irkilisterdiń aldyn alýǵa múmkindik beredi. 

Qostanaı oblysynda respýblıkalyq mańyzy bar Qostanaı — Mamlıýtka avtojolynyń 43 shaqyrymyna ortasha jóndeý jumystary aıaqtaldy. Jobanyń jalpy quny — 5,6 mlrd teńge.

Joldyń osy ýchaskesin jańǵyrtý qaýipsizdikti arttyrýǵa, kólik qatynasyn jaqsartýǵa múmkindik berdi, sondaı-aq Memleket basshysynyń Qazaqstannyń tranzıttik hab retindegi pozıtsııasyn nyǵaıtý jónindegi mindetteri sheńberinde kásipkerlikti damytýǵa jáne óńirdiń kólik-logıstıkalyq áleýetin nyǵaıtýǵa yqpal etti. 

Aqtóbe oblysynyń Qaraýylkeldi aýylynda rekonstrýktsııadan keıin temirjol vokzaly paıdalanýǵa berildi.

Jumystar Memleket basshysynyń tapsyrmasy boıynsha elimizdiń vokzaldaryn kezeń-kezeńimen jańǵyrtý sheńberinde oryndaldy. Jańǵyrtý aıasynda jalpy aýdany 207,73 sharshy metrdi quraıtyn bir qabatty vokzal ǵımaraty jańartylyp, 25 oryndyq kútý zaly jabdyqtaldy. Sonymen qatar vokzal mańy abattandyrylyp, joldar men jaıaý júrginshiler joldaryna qatty jabyn tóseldi, aýmaq kógaldandyryldy. 

Aýyl sharýashylyǵy jáne qaıta óńdeý

Qostanaı oblysynda joǵary sapaly súttiń ózindik óndirisin ulǵaıtý jáne ımportqa táýeldilikti tómendetý jónindegi jumys sheńberinde quny 3,2 mlrd teńge bolatyn zamanaýı taýarly-sút fermasy paıdalanýǵa berildi. Qýattylyǵy 400 malǵa arnalǵan kásiporyn jylyna 4380 tonnaǵa deıin sút óndirýge qaýqarly.

Kásiporynda Germanııadan satyp ákelingen golshteın asyl tuqymdy mal basy tartylyp, 30 jumys orny ashyldy. Aqmola oblysynyń Eńbek aýylynda quny 8,1 mlrd teńge bolatyn sút-taýarly fermasy iske qosyldy. Keshenniń jobalyq qýaty 900 bas sıyrǵa eseptelgen, al kútiletin jyldyq saýyn 4230 tonna sútti quraıdy. Kásiporyn úshin joǵary tehnologııalyq jabdyqtar satyp alyndy, sondaı-aq qaldyqtardy qaıta óńdeý jáne kádege jaratý jónindegi bıokeshen ornatyldy.

Energetıka

Qostanaı oblysynda jalpy qýaty 100 MVt jel elektr stansasy paıdalanýǵa berildi. Jobaǵa salynǵan ınvestıtsııa kólemi 38,6 mlrd teńgeni qurady. Nysanda árqaısysynyń qýaty 6,25 MVt bolatyn 16 jel generatory ornatylǵan.

Eki stansa jylyna 380 mln kVt/saǵ deıin elektr energııasyn óndire alady, bul óńirdiń energetıkalyq qaýipsizdigin nyǵaıtýǵa, ınfraqurylymdy damytý jáne halyqtyń ómir súrý sapasyn arttyrý úshin senimdi jaǵdaılardy qamtamasyz etýge múmkindik beredi.

Prezıdenttiń Jetisý oblysynyń Panfılov aýdanyndaǵy halyqty tabıǵı gazben qamtamasyz etý jónindegi tapsyrmalaryn oryndaý aıasynda birden bes eldi meken gazben jabdyqtaýǵa qosyldy. Atap aıtqanda Jıdeli, Aqaral, Qyzyljıde, Sarpyldaq, Kerimaǵash aýyldaryna jalpy uzyndyǵy 58 shaqyrym gaz qubyry tartyldy. Nátıjesinde 1,5 myńǵa jýyq turǵyn kógildir otynǵa qol jetkizdi.

Buǵan deıin Shymkentte múgedektigi bar azamattarǵa arnalǵan 150 oryndyq jańa ońaltý ortalyǵy ashylǵanyn jazǵanbyz.