Zaýyttar men vokzaldar: ótken aptada óńirlerde qandaı nysandar ashyldy
ASTANA. KAZINFORM — Memleket basshysy Qasym-Jomart Toqaevtyń tapsyrmalaryn júzege asyrý aıasynda elimizdiń óńirlerinde ónerkásip áleýetin arttyrý, kólik jáne turǵyn úı-kommýnaldyq ınfraqurylymdy jańǵyrtý, sondaı-aq azamattardyń ómir súrý sapasyn jaqsartý úshin áleýmettik ınfraqurylymdy damytý baǵytynda júıeli jumystar júrgizilip keledi.
Úkimet ótken aptada paıdalanýǵa berilgen jańa kásiporyndar, kólik toraptary men energetıka nysandary týraly jazdy.
Ónerkásip
Almaty oblysynyń Boraldaı aýylynda alkogolsiz sýsyndar shyǵaratyn jańa kásiporyn ashyldy. Jalpy quny $344 mln bolatyn joba aıasynda jergilikti 230 turǵyn jumyspen qamtyldy. Kásiporynda qajetti shıkizat jergilikti óndirýshilerden alynady. Daıyn ónimdi ishki naryqqa jáne TMD elderine jetkizý josparlanyp otyr. Soltústik Qazaqstan oblysynda uzaq saqtalatyn nan-toqash jáne kondıterlik ónimder shyǵaratyn zaýyt jumysyn bastady. 37 mlrd teńge kóleminde ınvestıtsııa salynǵan óndiristik keshende Eýropa elderinen ákelingen zamanaýı jabdyqtar ornatylǵan. Zaýyt tolyq qýatyna shyqqannan keıin jylyna 15 myń tonnaǵa deıin ónim óndire alady. Ekinshi jeli iske qosylǵan soń 378 jumys ornyn ashý josparlanǵan.
Vokzal ınfraqurylymyn jańǵyrtý
Kókshetaýda jańartylǵan temirjol vokzaly ashyldy. Ǵımaratta lıftiler men eskalatorlar ornatylyp, kedergisiz orta qalyptastyryldy. Jalpy aýmaǵy 0,75 gektardy quraıtyn vokzal mańy aýmaǵy da abattandyryldy. Vokzal 1981 jyly salynǵan, sońǵy kúrdeli jóndeý jumystary 20 jyldan astam ýaqyt buryn júrgizilgen. Jóndeý jumystary Memleket basshysynyń temirjol ınfraqurylymyn jańǵyrtý jónindegi tapsyrmalary aıasynda oryndaldy. Baǵdarlama aıasynda óńirdegi 16 nysannyń barlyǵy zamanaýı talaptarǵa saı jańǵyrtyldy.
Energetıka
Qaraǵandy oblysyndaǵy 500 kV «Nura» qosalqy stansasynda ekinshi avtotransformator paıdalanýǵa berildi. Joba óńirdegi elektr energetıkasy júıesiniń turaqtylyǵyn arttyryp, qosymsha qýat rezervin qalyptastyrýǵa, sondaı-aq «Saryarqa» AEA kásiporyndaryn qajetti kólemde elektr energııasymen qamtamasyz etýge múmkindik beredi.
Áleýmettik ınfraqurylym
Isataı aýdanynyń Toman aýylynda 80 orynǵa arnalǵan alǵashqy balabaqsha paıdalanýǵa berilýde. Nysannyń qurylysy tolyq aıaqtaldy. Ǵımarat bıylǵy qarasha aıynda ashylady dep josparlanyp otyr.
UBTECH Almatyda Qytaıdan tys alǵashqy zaýytyn ashatynyn jazǵan edik.
