Zaýyttar, IT-ortalyqtar: ótken aptada óńirlerde qandaı nysandar paıdalanýǵa berildi
ASTANA. KAZINFORM — Memleket basshysy Qasym-Jomart Toqaevtyń tapsyrmalaryn júzege asyrý aıasynda el óńirlerinde ónerkásiptik áleýetti damytý, kólik, ınjenerlik jáne áleýmettik ınfraqurylymdy jańǵyrtý, sondaı-aq azamattardyń ómir súrý sapasyn jaqsartý boıynsha júıeli jumys jalǵasyp keledi. Respýblıka kúni qarsańynda jańa ónerkásip kásiporyndary, bilim berý ortalyqtary, TKSh jáne áleýmettik sala nysandary paıdalanýǵa berildi, dep habarlady Úkimettiń baspasóz qyzmeti.
Ónerkásip jáne óndiris
Qaraǵandy oblysyndaǵy «Saryarqa» arnaıy ekonomıkalyq aımaǵynda alıýmınıı jáne bımetall jylytý radıatorlaryn shyǵaratyn Silumin of Qazaqstan zaýyty ashyldy. Tolyq óndiristik tsıkldi qamtıtyn joba alıýmınıı klasterin damytýǵa, ımportty almastyrý men jańa jumys oryndaryn qurýǵa baǵyttalǵan.
Túrkistan oblysynyń Temirlan aýylynda «Huating Biotechnology Co., LTD» JShS kompanııasynyń iri qara maldyń súıeginen maı men jelatın komponentterin óndiretin zaýyty iske qosyldy. Jalpy quny 9 mlrd teńge bolatyn kásiporyn aýyl sharýashylyǵy shıkizatyn tereń óńdeýdi jáne bıotehnologııa, mıkrobıologııa jáne farmatsevtıkada paıdalanylatyn pepton shyǵarýdy qamtamasyz etedi.
Túrkistan oblysynda maqta maıyn óńdeý zaýyty ashyldy. Jalpy quny 1,5 mlrd teńgeni quraıtyn jańa óndiristi iske qosý óńirde shıtti maqtany qaıta óńdeý kólemin jáne aýyl sharýashylyǵy ónimderiniń qosylǵan qunyn arttyrýǵa múmkindik beredi.
Densaýlyq saqtaý
Beskól aýylynda bir aýysymda 250 adam qabyldaı alatyn jańa emhananyń tehnıkalyq ashylýy ótti. Jalpy quny shamamen 5,1 mlrd teńgeni quraıtyn mekeme Qyzyljar aýdanynyń 40 myńnan astam turǵynyna medıtsınalyq qyzmet kórsetip, jergilikti deńgeıde dıagnostıkalaý jáne emdeý múmkindikterin keńeıtedi.
Bilim berý jáne tsıfrlandyrý
Aqtóbede AQTOBE IT HUB zamanaýı bilim berý ortalyǵy ashyldy. Munda bolashaq mamandaryn daıarlaý maqsatynda baǵdarlamalaý, robototehnıka, jasandy ıntellekt (JI) jáne basqa da tsıfrlyq salalar boıynsha bilim beriledi. Ortalyqtyń negizgi baǵyttarynyń biri – 18 jastan asqandarǵa arnalǵan Tomorrow School baǵdarlamalaý jáne jasandy ıntellekt mektebi. Onda halyqaralyq Peer-to-Peer oqytý modeli negizinde IT mamandyqtaryn tegin meńgere alady. Baǵdarlama 18 aıdan 24 aıǵa deıingi ýaqytty qamtıdy.
Shyǵys Qazaqstan oblysynyń Qystaý-Kúrshim aýylynda 50 oqýshyǵa arnalǵan jańa mektep paıdalanýǵa berildi. Nysan 1975 jyly salynǵan eski ǵımarattyń ornyna turǵyzyldy. Jańa mektep barlyq balany bir aýysymda oqytýǵa jáne pedagogterge zamanaýı jaǵdaıda jumys isteýge múmkindik ashty.
TKSh jáne ınfraqurylymdy damytý
Mańǵystaý oblysynda qaıta jańǵyrtýdan keıin hi-tech stılinde jobalanǵan temirjol vokzaly ashyldy. Úsh qabatty jańa keshenniń aýdany 9 myń sharshy metrden asady, bul burynǵy ǵımarattyń kóleminen 11 ese úlken. Nysan táýligine 2,5 myń jolaýshyǵa qyzmet kórsetýge eseptelgen, al jazǵy maýsymnyń qarbalas kezeńinde bul kórsetkishti 4 myń jolaýshyǵa deıin arttyrýǵa bolady. Infraqurylym quramyna keń kútý zaldary, kassalar, ana men bala bólmesi jáne kedergisiz orta kiredi.
Almaty oblysynyń Qarasaı aýdanyndaǵy Jarmuhambet aýylynda jańa aýyzsý júıesi paıdalanýǵa berildi. Quny 1,4 mlrd teńge bolatyn joba aıasynda 51 shaqyrym sý qubyry tartylyp, eki sý uńǵymasy burǵylandy jáne árqaısysynyń kólemi 300 tekshe metr bolatyn eki rezervýar salyndy.
Aqtóbe oblysynda gıdrotehnıkalyq qurylystarǵa qyzmet kórsetetin mekemege 26 birlik arnaıy tehnıka satyp alyndy. Onyń ishinde avtokrandar, shynjyr tabandy ekskavator, tıegish, kran-manıpýlıatorlar, burǵylaý mashınasy jáne tartqyshtar bar. Jańa tehnıka gıdrotehnıkalyq qurylystardy kútip ustaý jumystarynyń jedeldigi men sapasyn arttyryp, sý basýdyń aldyn alý sharalaryn kúsheıtýge múmkindik beredi.
Áleýmettik sala jáne týrızm
Aqtóbe oblysynyń Shubarqudyq kentinde jalpy aýdany 1,6 myń sharshy metr bolatyn jańa jabyq júzý basseıni ashyldy. Nysan aýdandyq balalar men jasóspirimder sport mektebine berildi. Qazirgi ýaqytta basseınde 84 bala júzýmen aınalysady. Aldaǵy ýaqytta onyń ótkizý múmkindigin 130 orynǵa deıin arttyrý josparlanǵan.
Aqmola oblysynyń Aqqaıyń aýylynda jańa ekopark ashyldy. Onyń serýendeý baǵyttarynyń jalpy uzyndyǵy 2,4 shaqyrym. Demalys aımaǵy týrıstik ınfraqurylymdy keńeıtý jáne Astana aglomeratsııasynyń turǵyndary men qonaqtary úshin qala syrtyndaǵy demalysty damytý aıasynda qurylǵan.
Almaty oblysynyń Jambyl aýdanynda jáne Aqtóbe qalasynyń Jańaqonys kentinde jańa mádenıet úıleri ashyldy. Nysandar mádenı-buqaralyq is-sharalardyń qoljetimdiligin arttyryp, jergilikti turǵyndardyń bas qosatyn ortalyǵyna aınalmaq. Jańa ınfraqurylym óńir turǵyndarynyń shyǵarmashylyqpen aınalysýyna jáne bos ýaqytyn mazmundy ótkizýge jaǵdaı jasaıdy.
Elimizde jol qurylysynyń sapasyn baǵalaý júıesi qaıta qaralyp jatqanyn jazǵan edik.
