Zaýyttaǵy jarylys: zardap shekkenderdiń bári qaıtys boldy

QONAEV. KAZINFORM — Almaty oblysyndaǵy un ónimderin óndiretin zaýyt aýmaǵynda bolǵan jarylys saldarynan zardap shekken tórt adamnyń bári qaıtys boldy.

Oqıǵa oryn alǵan «AzııaAgrofýd» AQ resmı málimdeme jasady.

— 23 mamyrda zaýyt aýmaǵynda oryn alǵan qaıǵyly oqıǵa saldarynan áriptesterimizdiń qaza tapqany týraly qaraly habardy aýyr kúızelispen qaıǵyra jetkizemiz. Bul tragedııa búkil kompanııa úshin aýyr soqqy boldy. Biz qyzmetkerlerdi ǵana emes, jumysyna adal jáne adamgershiligi mol jandardan aıyrylyp qaldyq, — delingen habarlamada.

Kompanııa ókilderi zańnama men korporatıvtik baǵdarlamalar aıasynda qarastyrylǵan saqtandyrý tólemderinen bólek, marqumdardyń otbasyna qosymsha materıaldyq kómek kórsetiletinin málimdedi.

— Biz jerleý rásimin uıymdastyrýǵa baılanysty barlyq shyǵyndy óz moınymyzǵa alamyz, sondaı-aq áriptesterimizdiń qaryzdary bolsa tolyq óteımiz. Ár otbasyǵa psıhologııalyq jáne zańdyq qoldaý kórsetiledi, qajet bolǵan jaǵdaıda jeke kómek te uıymdastyrylady, — dep atap ótti kompanııadan.

Buǵan deıin Almaty oblystyq densaýlyq saqtaý basqarmasy 23 mamyr kúni denesiniń 70–80% kúıik shalǵan tórt adamnyń Qarasaı kópsalaly ortalyq aýdandyq aýrýhanasyna jetkizilgenin habarlaǵan bolatyn. 

Dárigerler olardyń jaǵdaıyn asa aýyr dep baǵalaǵan. 24 mamyr kúni 49 jastaǵy er adam kóz jumdy.

Eske salaıyq, 23 mamyr Almaty oblysy Qarasaı aýdanynyń Jibek Joly aýylynda ornalasqan un ónimderin óndirý tsehynyń aýmaǵynda jarylys bolyp, artynsha órt shyqqany týraly jazǵan edik.