Zaýytta jumys istep, densaýlyǵynan aıyrylǵan aqtóbelik 17 mln teńge óndirip aldy
AQTÓBE. KAZINFORM - Aqtóbedegi zaýytta 25 jyldan astam ýaqyt boıy jumys istep, eki ókpesiniń birinen aırylǵan aqtóbelik jumysshy 17 mln teńge óndirip aldy.
Aqtóbe qalalyq sotynda jumysshynyń jumys berýshiden moraldyq zııandy óndirý týraly azamattyq isi qaraldy. Іs materıalyna súıensek, talap qoıýshy 25 jyldan astam ýaqyt boıy zaýyttp eńbek etken.
Taraptar arasynda eńbek kelisimsharty buzylǵan. Óndiriste, zııandy eńbek jaǵdaılarynda jumys istegen qyzmetker aýrýǵa shaldyǵyp, eńbekke qabilettiligin joǵaltqan. 2021 jyly onkologııalyq aýrý anyqtalyp, Sankt-Peterbýrg qalasynda aqyly ota jasalyp, bir ókpesinen aıyryldy. Oǵan ІІ toptaǵy múgedektigi berildi.
- Qyzmetker kásiptik aýrýǵa shaldyqqanynda jumys berýshiniń 100% kinási anyqtalǵan, jumysshynyń eńbekke qabilettiliginen aıyrylý dárejesi 89%-dy qurady. Azamattyq kodekstiń 931-babynyń 1-tarmaǵyna sáıkes jaýapker kinásiniń dárejesine qaramastan, qyzmet aınalasyndaǵylar úshin qaýiptiliktiń joǵarylyǵymen baılanysty zańdy tulǵa retinde talap qoıýshynyń densaýlyǵyna keltirilgen moraldyq zııandy óteýge mindetti. Sot onkologııalyq aýrýyn, ómirlik mańyzy bar múshesi, ıaǵnı, ókpesiniń alynǵanyn, tynys alý jetkiliksizdigi sekildi asqynýlardyń paıda bolýyn, qazirgi tańda talap qoıýshy basqa adamdardyń kómegine muqtaj ekenin eskerdi. Aqtóbe qalalyq sotynyń sheshimimen jumys berýshiden talap qoıýshynyń paıdasyna 17 000 000 teńge mólsherinde moraldyq zııan óndirý mindetteldi. Sot sheshimi zańdy kúshine engen joq, - dep habarlady Aqtóbe oblystyq sottyń baspasóz qyzmeti.
