Zarına Dııastyń Ýımbldonǵa nege qatyspaǵany belgili boldy
ASTANA. QazAqparat - Qazaqstandyq tennısshi Zarına Dııastyń Ýımbldon týrnırine nege qatyspaǵany belgili boldy, dep habarlaıdy QazAqparat tilshisi.
Bul týraly tennısshiniń ózi Instragramdaǵy paraqshasynda jazdy.
«Ókinishke qaraı, tize jaraqatyna baılanysty ózim jaqsy kóretin Ýımbldon týrnırine qatysa almadym. Ýımbldonǵa deıin jaraqatymnan tolyq aıyǵamyn ba dep oılap edim, áıtse de oǵan kóbirek ýaqyt kerek eken. Qazir ózimdi birshama jaqsy sezinemin, hard maýsymy bastalýyn taǵatsyzdana kútemin. Bárińizge meni qoldap, senim bildirgenderińiz úshin rahmet!» dedi Zarına Dııas.
Qazirgi kezde reıtıngte 54-inshi satyda turǵan Z.Dııas bıylǵy Ýımbldon týrnıriniń alǵashqy aınalymynda álemniń 25-inshi raketkasy, avstralııalyq Darıa Gavrılovamen kezdesýi kerek edi. Biraq, ózi málimdep otyrǵanyndaı, oǵan bıylǵy Nottıngem týrnırinde alǵan jaraqaty múmkindik bermedi.
Zarınanyń súıikti ári tabysty óner kórsetip júrgen jarysy Ýımbldon týrnıri ekendigi anyq. Ol buǵan deıin Ýımbldonnyń 2014 jáne 2015 jyldary tórtinshi, ótken jyly úshinshi aınalymyna deıin jetken bolatyn.
Osydan keıin hard týrnırleri, sosyn tamyz aıynyń aıaǵyna taman «Úlken dýlyǵa» týrnıriniń sońǵysy - US Open jarysy bastalady. Zarına Dııasqa osy saıystarda sáttilik serik bolsa, reıtıngisin jaqsartary anyq.
Eske sala keteıik, Ýımbldon týrnırinde Qazaqstannyń birinshi, álemniń 53-inshi raketkasy ıÝlııa Pýtıntseva búgin ekinshi aınalymda reıtıngte 14-inshi orynda turǵan reseılik Darıa Kasatkınamen oınaıdy. Al erler arasynda Mıhaıl Kýkýshkın álemniń birinshi raketkasy, ıspanııalyq Rafael Nadalmen kezdesedi.
