Zarına Dııas WTA týrnırinde alǵash ret jeńiske jetti
ASTANA. QazAqparat - Qazaqstandyq tennısshi, álemniń 100-inshi raketkasy Zarına Dııas halyqaralyq Tokıo týrnıriniń jeńimpazy atandy, dep habarlaıdy «QazAqparat» tilshisi.
Myscore.ru saıtynan tikeleı kórsetilimde belgili bolǵanyndaı, Zarına fınaldyq básekeniń birinshi partııasynda álemdik reıtıngte 171-inshi orynda turǵan qarsylasy, japonııalyq Mııý Katodan 6:2 esebimen basym tústi. Ekinshi partııa áldeqaıda tartysty órbidi. Esep 5:5 bolǵan kezde qazaqstandyq tennısshi breık jasap, alǵa shyqty. Budan keıin Zarına óz geımin bermeı, 7:5 esebimen jeńiske jetti. Match 1 saǵat 19 mınýtqa sozyldy.
Bul - Zarınanyń sporttyq jolyndaǵy WTA týrnırindegi alǵashqy jeńisi. Ol osyǵan deıin 2014 jyly Japonııanyń Osaka qalasynda ótken halyqaralyq týrnırde avstralııalyq tennısshi Samanta Stosýrǵa fınalda ese jibergen bolatyn.
Eske sala keteıik, Tokıo týrnıriniń júlde qory 226 750 AQSh dollaryn quraıdy.
