Zarına Dııas Ýımbldon týrnıriniń irikteý saıysyn jeńispen bastady

LONDON. KAZINFORM - Qazaqstandyq tennısshi, álemniń 967-raketkasy Zarına Dııas Ýımbldon týrnıriniń irikteý saıysyn sátti bastady. 

Bir kezderi álemdik reıtıngide 31-orynǵa deıin kóterilgen qazaqstandyq tennısshi jaraqatyna baılanysty kortqa eki jyldyq úzilisten keıin bıyl oralǵan edi. 

Zarınanyń «Úlken dýlyǵa» jarystaryndaǵy basty tabystary osy Ýımbldonǵa baılanysty ekenin aıta keteıik. Ol 2014 jáne 2015 jyldary tórtinshi aınalymǵa deıin jetken bolatyn.

Bul joly Dııas irikteý saıystarynyń shırek fınalynda álemniń 208-raketkasy, taılandtyq Manancheıa Savangkaevpen kezdesti. Breık almasýmen bastalǵan matchta Zarına 7:5, 7:5 esebimen jeńiske jetti.

Otandasymyz 1 saǵat 45 mınýtqa sozylǵan báseke barysynda 2 eıspen birge 12 breık-poınttyń 8-in paıdalandy. Taılandtyq tennısshi 2 eıs, 6 breıkpen (11 breık-poınt) erekshelendi.

Zarına Dııas irikteý saıystarynyń fınalyna shyǵý úshin álemniń 138-raketkasy, amerıkalyq Sachııa Vıkerımen talasady. Ol reıtıngide 230-oryndaǵy Soltústik Makedonııa ókili Lına Djercheskany tize búktirdi — 7:6 (7:1), 7:6 (7:5).

Qazaqstannyń birinshi jáne ekinshi raketkalary Elena Rybakına men ıÝlııa Pýtıntseva osy aptada eshqandaı dodada óner kórsetpeıdi. Rybakına Istbýrn (Ulybrıtanııa), Pýtıntseva Bad-Hombýrg (Germanııa) jarysyna qatysýdan bas tartty. 

Eske sala keteıik, budan buryn qazaqstandyq úsh tennısshiniń Ýımbldon týrnıri irikteý kezeńiniń jartylaı fınalyna ótkenin jazǵan bolatynbyz.