Zarına Dııas Shtýtgartta negizgi týrnırge joldama aldy
ASTANA. QazAqparat - Qazaqstannyń birinshi, álemniń 52-inshi raketkasy Zarına Dııas Shtýtgart týrnırinde irikteý saıysynyń fınalynda estonııalyq Kaııa Kanepıdi utty, dep habarlaıdy QazAqparat.
Asa tartysty ótken match barysynda birinshi partııada Zarına 6:4 esebimen jeńiske jetti. Ekinshisinde dúnrejúzilik reıtıngte 61-inshi satyda turǵan Kanepı dál sol eseppen ese qaıyrdy.
Sheshýshi, úshinshi partııada Zarına birden breık jasap, alǵa shyqty. Budan keıin óz múmkindigin múlt jibergen joq. Sóıtip bul partııany da 6:4 esebimen óz paıdasyna jazdy. Osylaısha 2 saǵat 19 mınýtta sozylǵan kezdesýde qarsylasyn tize búktirgen Z.Dııas negizgi týrnırge joldama aldy. Z.Dııastyń Shtýtgart týrnırindegi kelesi qarsylasy keıin belgili bolady.
Júlde qory 816 myń AQSh dollary turatyn Shtýtgart jarysy 29 sáýirde aıaqtalady.
Búgin jańartylǵan reıtıngte Z.Dııas 48-inshi orynnan 52-inshi satyǵa syrǵyp ketken edi. Endi upaıdy kóbirek ıelenip, reıtıngisin jaqsartý úshin Shtýtgart týrnırin barynsha sátti ótkizý qajet-aq.
Aıta keteıik, Qazaqstannyń birinshi, álemniń 95-inshi raketkasy Mıhaıl Kýkýshkın Barselonada ótip jatqan halyqaralyq týrnırdiń alǵashqy aınalymynda dúnıejúzilik reıtıngte 129-ynshy orynda turǵan ıspanııalyq Marsel Granolersten 2:6, 2:6 esebimen utylyp qaldy. Endi M.Kýkýshkın úzdik júzdiktiń qatarynan shyǵyp qalatyn shyǵar.
