Zarına Dııas Shtýtgart týrnırinde jeńilip qaldy
ASTANA. QazAqparat - Búgin Shtýtgart týrnıriniń ekinshi aınalymynda qazaqstandyq Zarına Dııas álemniń besinshi raketkasy, latvııalyq Elena Ostapenkomen kúsh synasty, dep habarlaıdy QazAqparat tilshisi.
Dúnıejúzilik reıtıngte 52-inshi orynda turǵan Zarına birinshi partııada Rolan Garros týrnıriniń ótken jylǵy jeńimpazyna barynsha qarsylasyp baqty. Áıtse de esep 4:3 bolǵan mezette E.Ostapenko breık jasap, odan keıin boı bermedi. Sóıtip ol bul partııany 6:3 esebimen aıaqtady. Ekinshi partııada latvııalyq tennısshi birde-bir geımdi bergen joq. Esep - 6:0.
Zarınanyń bulaısha jeńilýine onyń osy týrnırde irikteý saıystaryn qosqanda, qatarynan bes kezdesý ótkizýi de áser etpeı qalǵan joq. Al E.Ostapenko tyńnan qosylyp, búgin alǵashqy oıynyn ótkizdi.
Eske sala keteıik, Z.Dııastyń keshe Shtýtgart týrnıriniń ekinshi aınalymyna shyqqanyn jazǵan bolatynbyz.
