Zarına Dııas Rabat týrnırinde jeńilip qaldy
ASTANA. QazAqparat - Qazaqstannyń birinshi, álemniń 54-inshi raketkasy Zarına Dııas Rabat (Marokko) týrnıriniń alǵashqy aınalymynda ıtalııalyq Sara Erranımen kúsh synasty, dep habarlaıdy QazAqparat tilshisi.
S.Erranı dúnıejúzilik reıtıngte 89-ynshy orynda turǵanymen, asa tájirıbeli tennısshi. Sondyqtan onyń osal qarsylas emestigi anyq-ty.
Birinshi partııada Zarına breık jasap, 3:1 esebimen alǵa shyqqanymen, basymdylyqty paıdalana almady. Kóp uzamaı S.Erranı oıyn tizginin qolǵa alyp, 6:4 esebimen jeńiske jetti.
Ekinshi partııa da tartysty bolyp, aldymen S.Erranı alǵa shyǵyp, keıin qazaqstandyq tennısshi tarazy basyn teńestire aldy. Áıtse de esep 3:3 bolyp turǵan mezette ıtalııalyq tennısshi qaıta breık jasady. Sóıtip bul joly da ol 6:4 esebimen basym tústi. Kezdesý 1 saǵat 40 mınýtqa sozyldy.
Osylaısha Rabat týrnıri Z.Dııas úshin de sátsiz boldy.
Eske sala keteıik, budan buryn osy Rabat týrnırinde taǵy bir qazaqstandyq tennısshi ıÝlııa Pýtıntsevanyń, sodan keıin Mıýnhende Mıhaıl Kýkýshkınniń birinshi aınalymnan asa almaǵanyn jazǵan bolatynbyz.
