Zarına Dııas Portýgalııadaǵy týrnırde japonııalyq tennısshini jeńdi

ASTANA. KAZINFORM — Qazaqstandyq, álemniń 280-raketkasy Zarına Dııas Gımaraınsh (Portýgalııa) ITF W50 týrnıriniń ekinshi aınalymyna joldama aldy.

Jarystyń 5-raketkasy bolyp tirkelgen qazaqstandyq tennısshi alǵashqy aınalymda reıtıngide 615-satydaǵy japonııalyq Akıko Omaemen sheberlik baıqasty.

Bir saǵat 35 mınýtqa sozylǵan matchta Zarına 7:5, 6:2 esebimen jeńiske jetti.
Qazaqstandyq sportshynyń kelesi qarsylasy keıin anyqtalady.

Qazirgi kezde Zarına Dııas WTA Live reıtıngisinde 277-orynǵa kóterilip tur.

Ótken aıda Japonııadaǵy dál osyndaı dodada jeńimpaz atanǵan Zarına osymen qatarynan altynshy kezdesýinde jeńiske jetip otyr.

Eske sala keteıik, budan buryn Elena Rybakınanyń London týrnırindegi qarsylasy anyqtalǵanyn jazǵan bolatynbyz.

Sondaı-aq Aleksandr Shevchenko Bratıslava jarysynyń ekinshi aınalymyna ótti.