Zarına Dııas eki jyldyq úzilisten keıin kortqa qaıta oralmaq
ASTANA. KAZINFORM – Qazaqstandyq tennısshi Zarına Dııas Japonııada ótetin W50 KASHIWA KASHIWA OPEN týrnırine qatysady.
Atalmysh týrnır 1-7 sáýir aralyǵynda ótedi.
Bul Zarınanyń jaraqatyna baılanysty eki jylǵa sozylǵan úzilisten keıingi alǵashqy dodasy bolmaq. Qazaqstandyq sportshy sodan keıin 12-13 sáýirde osy elde ótetin Bıllı Djın Kıng kýbogynyń Japonııamen irikteý kezeńinde Qazaqstan namysyn qorǵaıdy.
Kezinde álemdik reıtıngide 31-orynǵa deıin kóterilgen Zarına Dııastyń tennıstegi eń úlken tabysy Japonııa jerimen baılanysty ekenin aıta ketken jón. Ol 2017 jyly Tokıo WTA týrnıriniń jeńimpazy atanǵan edi.
Eske salaıyq, budan buryn Zarına Dııastyń Almatyda jas tennısshilermen sheberlik saǵatyn ótkizgenin jazǵan bolatynbyz. Sondaı-aq Aleksandr Nedovesov Ispanııadaǵy týrnırdiń shırek fınalyna joldama aldy.
