Zarına Dııas Aýstralııa chempıonatynyń úshinshi aınalymyna shyqty
NUR-SULTAN. QazAqparat – Qazaqstandyq Zarına Dııas Aýstralııa ashyq chempıonatynyń úshinshi aınalymyna shyqty, dep habarlaıdy QazAqparat tilshisi.
Dúnıejúzilik reıtıngte 73-orynda turǵan Z.Dııas ekinshi aınalymda álemniń 58-raketkasy, reseılik Anna Blınkovamen kezdesti.
Buǵan deıin 21 jastaǵy A.Blınkova ótken jyly Beıjiń týrnıriniń irikteý saıysynda 1993 jylǵy Z.Dııasty 6:2, 7:5 esebimen utqan edi. Al bıyl Qytaıdaǵy Shenchjen dodasynda Zarına 6:1, 6:7 (9:11), 6:4 esebimen ese qaıyrǵan bolatyn.
Birinshi partııada qazaqstandyq tennısshi 4:2 esebimen alǵa shyqqanymen, sol basymdylyqty ustap tura almaı, jeńilip qaldy – 4:6.
Esesine ekinshi sette 6:3 esebimen qarymta qaıyrdy. Bul partııa kezinde jańbyrǵa baılanysty úzilis oryn aldy.
Sheshýshi, úshinshi partııada Zarına breıkpen 2:0 esebimen alǵa shyqqanymen, qarsylasy qatarynan úsh geımdi aldy. Degenmen Zarına sol boıda qaıta teńestirip, ózi alǵa ketti – 4:3. Sodan keıin esep 5:4 bolǵan kezde A.Blınkova dop bergende, ekinshi matchbolyn sátti paıdalandy – 6:4.
Asa tartysty match 2 saǵat 8 mınýtqa sozyldy.
Z.Dııas úshinshi aınalymda álemniń onynshy, osy jarystyń 9-raketkasy, Nıderlandy ókili Kıkı Bertens nemese reıtıngte 163-satydaǵy aýstralııalyq Arına Rodıonovanyń bireýimen sheberlik baıqasady.
Eske sala keteıik, budan buryn Aýstralııa birinshiliginiń úshinshi aınalymyna shyqqan Elena Rybakınanyń álemniń birinshi raketkasymen kezdesetinin jazǵan bolatynbyz.
