Zarına Dııas almatylyq jas tennısshilerdiń suraqtaryna jaýap berdi
ALMATY. QazAqparat – Tanymal tennısshimen kezdesýge ońtústik astananyń túrli tennıs ortalyqtarynan 50-ge jýyq bala keldi, dep habarlaıdy QazAqparat tennıs federatsııasynyń Facebook-tegi paraqshasyna silteme jasap.
Zarına jas sportshylardyń suraqtaryna jaýap berdi, aqylyn aıtty, sonymen qatar aldaǵy maýsymdaǵy josparlarymen bólisti. Balalar qazaqstandyq tennıs juldyzyna qyzyqty suraqtar daıyndap kelipti.
Zarına bala kezinde gımnastıkamen aınalysqan eken, alaıda tennıske degen qyzyǵýshylyǵy basym túsken. Ol esinde jaqsy saqtalǵan matchtar retinde Serena Ýılıams jáne Marııa Sharapovamen ótkizgen kezdesýlerin aıtty.
Sportshynyń aıtýynsha, álemniń túrli qalalarynda kóptegen alańda jattyqqanyna qaramastan, olar Almatyda jattyqqanǵa jetpeıdi eken. Mansabyn aıaqtaǵannan keıin Zarına balalardy jattyqtyryp, óziniń tennıs akademııasyn qurýdy josparlap júrgenin aıtty. «Qandaı balmuzdaq unatasyz?» - degen suraq qoıdy Tennıs federatsııasynyń tárbıelenýshisi Kırıll. Barlyq suraqtardyń ishinde Zarına osy suraqty unatty. Zarına karamel balmuzdaqty unatatyn bolyp shyqty. Bul suraǵy úshin Kırıll sportshynyń qoltańbasy bar fýtbolkany syılyqqa aldy.
Tennıs federatsııasynyń Almatydaǵy fılıalynyń ókili de sportshyǵa suraq qoıdy.
- Maýsym qalaı ótti? Josparlaǵan nárseler oryndaldy ma?
- Árıne, bul uzaq maýsym boldy. Jaraqattar boldy. Alaıda qazir qalpyma kelip jatyrmyn, kelesi maýsymǵa tolyq daıyndyqpen kelemin degen úmittemin.
- Bıyl birinshi ret Olımpıadaǵa qatystyńyz. Qandaı sezimde boldyńyz?
- Sózben aıtyp jetkize almaımyn. Olımpıadadaǵy atmosfera ǵajap, eshteńemen salystyrýǵa kelmeıdi. Álemniń eń myqty sportshylary jarysqa qatysý úshin jınalady. Ókinishke oraı, jaraqattardyń kesirinen oılaǵanymdy kórsete almadym, alaıda Parıjde ótetin kelesi Oıyndarǵa qatysamyn degen úmittemin, dedi Zarına.
