Zardap shekkenderdiń zalalyn óteý «Ekibastuzteploenergo» JShS esebinen júrgiziledi - ákimdik
Bul týraly búgin Ekibastuz qalasy ákimdiginiń baspasóz qyzmeti habarlady.
Baspasóz qyzmetiniń málimetterine qaraǵanda, turǵyndar jylýmen jabdyqtaý máselelerimen «Ekibastuzteploenergo» JShS apattyq qyzmetine táýlik boıy júgine alady.
Úı-jaılarda qajetti temperatýralyq rejım belgilengennen keıin mektepter men balabaqshalardyń jumysyn shtattyq rejımde qaıta bastaý josparlanyp otyr.
Tótenshe jaǵdaıdan shyǵynǵa ushyraǵan azamattardyń ótinishterin qabyldaý jalǵasýda. Ótinishter tirkelgennen keıin odan ári óteý úshin zalaldy aıqyndaı otyryp, turǵyn úıdi komıssııalyq tekserý júrgiziledi.
TJ aımaǵynda zardap shekken azamattardyń zalalyn óteý «Ekibastuzteploenergo» JShS esebinen júrgiziledi.
Jylýsyz qalǵan úıler qarasha jáne jeltoqsan aılarynda aqy tólemeıdi, qalǵan jaǵdaılarda – qaıta esepteý júrgiziledi.
«Tótenshe jaǵdaı rejımi kezinde tutynylǵan elektr energııasynyń qyzmetterin qaıta esepteý máseleleri qarastyrylýda»,-delingen habarlamada.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.
Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklıar qalalyq jylý jelilerindegi apattyń saldaryn joıý jónindegi jumystar aıaqtalǵansha Ekibastuzda bolatyny habarlandy.
Roman Sklıar telefon arqyly Úkimet basshysy Álıhan Smaıylovqa qalalyq jylý jelilerindegi apattyń zardaptaryn joıý barysy týraly baıandady.
Prezıdent Qasym-Jomart Toqaev Ekibastuzdaǵy jóndeý jumystarynyń barysy týraly Premer-Mınıstrdiń baıandamasyn tyńdady.
Osyǵan deıin Ekibastuzdaǵy jylý júıesin jóndeý 15 jeltoqsanǵa deıin aıaqtalatynyn habarlaǵan bolatynbyz.
Foto: «Pavlodarenergo» AQ