Zardap shekken óńirlerge kómek kórsetetin qorlar qurý máselesin zertteý qajet – QR AShM
QR Aýyl sharýashylyǵy mınıstriniń mindetin atqarýshy Erbol Qarashókeevtiń tóraǵalyǵymen jmıynda shtab músheleri jem-shóp daıyndaý jáne qamtamasyz etý máselelerin talqylady.
«Qazirgi ýaqytta Aýyl sharýashylyǵy mınıstrligi astyq qoryn mol kólemde jedel satyp alý úshin Azyq-túlik korporatsııasynyń jarǵylyq kapıtalyn 20 mlrd teńgege ulǵaıtýǵa Ulttyq ekonomıka mınıstrligine ınvestıtsııalyq usynys jiberdi. Oń qorytyndy kútemiz», - dedi vedomstvo basshysy.
Sondaı-aq, Ulttyq ekonomıka mınıstrligine «QazAgroQarjy» AQ-na fermerlerdiń jem-shóp daıyndaý tehnıkasy men sýarýdyń utqyr júıelerin satyp alýǵa arnalǵan ótinimderin qarjylandyrý úshin qarajat bólý týraly memlekettik ınvestıtsııalyq usynys jiberildi.
Oblystyq shtab ókilderiniń baıandamalaryn tyńdaǵan mınıstrlik basshysy Qyzylorda oblysyna tamyz aıynda Úkimet rezerviniń qarajatyn tolyq ıgerýdi jáne oryndalýy tıis naqty nátıjelerdi qamtamasyz etýdi tapsyrdy.
Taıaý ýaqytta elimizdiń ortalyq jáne soltústik óńirlerinde astyq jınaý naýqany bastalady jáne tıisinshe negizgi kúsh soǵan jumsalatyn bolady. Qalǵan ýaqyt ishinde oblys ákimdikteri mal azyǵyn daıyndaýdy jandandyryp, qajetti kólemniń oryndalýyn qamtamasyz etýdi jáne jem-shóp daıyndaýǵa arnalǵan arzandatylǵan dızel otynynyń teń bólinýin erekshe baqylaýǵa alýy qajet.
«Bir aptanyń ishinde oblys aýmaǵyndaǵy árbir un tartý kásipornynan alynatyn kebek kólemin jeke-jeke kórsete otyryp, astyqty qaıta óńdeýdiń aı saıynǵy kólemi týraly aqparat jınasyn. Bul, jaǵdaıdy taldaý jáne keıinnen mal sharýashylyǵy sýbektileri men JQSh arasynda bólý úshin jáne zardap shekken óńirlerge jetkizý máselelerin anyqtaý úshin qajet», - dep tapsyrdy Erbol Qarashókeev.
Mańǵystaý oblysynyń ákimdigi bıyl qystaýǵa kiretin mal sanyn naqtylaý jumystaryn aıaqtaýy kerek. Statıstıka derekteri boıynsha bıylǵy jyldyń 1 shildesine Mańǵystaý oblysynda 28,6 myń bas ІQM, 452,3 myń bas UMM, 122,4 myń bas jylqy jáne 84,7 myń bas túıe bar.
«Bizge sýbektilerdiń sanattary boıynsha jem-shóppen qamtamasyz etý týraly shynaıy aqparat qajet. Ákimdikterde árbir fermerlik sharýashylyqtyń jem-shóppen qamtamasyz etilý jáne olardyń jem-shóp qoryn óz kúshterimen jınaýdyń áleýetti múmkindikteri jóninde tolyq aqparat bolýǵa tıis. Sizder qaı sharýa óz máselesin sheshe almaı jatqanyn jáne qandaı kólemde kómekke muqtaj ekenin bilýlerińiz kerek. Ár aýyl ákiminde árbir jeke qosalqy sharýashylyqtyń qajettiligi týraly tolyq aqparat bolýy tıis. Az qamtylǵan jáne kóp balaly otbasylar erekshe esepke alynýy kerek», - dedi E.Qarashókeev.
Bul aqparat mınıstrlikke kórsetiletin kómektiń kólemin boljaýǵa jáne onyń kómek kózderin izdeý úshin qajet.
Búgingi tańda Úkimettiń tapsyrmasyna sáıkes aımaqtar jemdik maqsattarǵa arpa men qara bıdaı sabanyn jınap, prestep jatyr, onyń bir bóligi zardap shekken aımaqtardyń qajettilikteri naqtylanǵannan keıin jetkiziledi.
«Oblys ákimderiniń orynbasarlary jergilikti jerlerde zardap shekken óńirlerge kómek qorlaryn qurý máselesin zertteýleri qajet. Osyndaı qordy qurý aýyl sharýashylyǵy taýaryn óndirýshiler arasynda osy qıyn kezeńde zardap shekken aımaqtardaǵy áriptesterine kásibı yntymaqtastyq pen kómek kórsetýdiń mańyzdylyǵy týraly tıisti túsindirý jumystarymen súıemeldense durys bolar edi», - dep atap ótti mınıstrdiń m.a.
Esterińizge sala keteıik, quramyna oblystar men aýdan ákimderiniń orynbasarlary, «Báıterek» holdıngi men Azyq-túlik korporatsııasynyń qarjylandyrýshy uıymdarynyń basshylary engen Aýyl sharýashylyǵy mınıstrligi janyndaǵy Respýblıkalyq jedel shtab jem-shóp daıyndaý máseleleri boıynsha jergilikti atqarýshy organdardyń is-qımylyn úılestirý úshin qurylǵan bolatyn.