Zardap shekken balanyń sýreti men jeke málimetin taratqandarǵa aıyppul salynady

ASTANA. QazAqparat - Qazaqstanda BAQ-ta jáne telekommýnıkatsııanyń basqa da jelilerinde quqyqqa qarsy áreketten zardap shekken bala týraly aqparat jarııalansa, 200 AEK-ke (450 myń teńgeden astam) deıin aıyppul salý josparlanyp otyr, dep habarlaıdy QazAqparat.

Bundaı norma búgin Májiliste tanystyrylǵan «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasynda qamtylǵan.

Atap aıtqanda, zań jobasy boıynsha atalǵan quqyqqa qarsy áreket úshin salynatyn aıyppuldardyń somasy kórsetilgen.

Mysaly, quqyqqa qarsy áreketten zardap shekken balanyń fotosýretteri men jeke málimetterin taratqan jeke tulǵalarǵa 5 AEK kóleminde, laýazymdy tulǵalar men shaǵyn kásipkerlik sýbektilerine nemese kommertsııalyq emes uıymdarǵa - 25 AEK, orta kásipkerlik sýbektilerine -50 AEK, iri kásipkerlik sýbektilerine 100 AEK mólsherinde aıppul salynýy múmkin.

Eger de bir jyldyń ishinde ákimshilik jaza belgilengennen keıin atalǵan jaǵdaı qaıtalansa, jeke tulǵalarǵa- 50 AEK, laýazymdy tulǵalar men shaǵyn kásipkerlik sýbektilerine nemese kommertsııalyq emes uıymdarǵa - 50 AEK, orta kásipkerlik sýbektilerine -100 AEK, sondaı-aq iri kásipkerlik sýbektilerine 200 AEK kóleminde aıyppul salý eskerilgen.