Zara-nyń ıesi álemdegi 1000-nan asa dúkenin jappaq
MADRID. QazAqparat – Zara jáne Bershka ıesi koronavırýs pandemııasyna baılanysty satylym eki esege tómendep ketkendikten álem boıynsha 1200-ge jýyq dúkenin jabatyn boldy. Bul týraly QazAqparat The Guardian basylymyna silteme jasap habarlaıdy.
Negizinen shaǵyn jáne eski dúkender jumysyn toqtatady. Quramynda Zara ǵana emes, Bershka, Pull & Bear jáne Massimo Dutti bar Inditex kontserniniń ıegeri Amansıo Ortega onlaın satylymdy ulǵaıtý týraly sheshim qabyldaǵan.
Inditex kontserniniń málimdemesine sáıkes, Eýropa men Azııadaǵy 1000-nan 1200-ge deıin dúkender jabylady. Qyzmetkerler sany qysqarmaıdy. Biraq olarǵa onlaın-saýdany jiberý sekildi basqa qyzmet usynylady.
Inditex dúkenderiniń jalpy sany 7 412-den 6 700-ge deıin qysqarady. Sonymen qatar 450 jańa dúken ashylatyny habarlandy. Biraq rıteıler qaı jerde jáne qaı brendtiń ashylatynyn naqtylamady.
Inditex – álemdegi eń iri kıim rıteıleriniń biri. Ol aqpan men 30 sáýir aralyǵynda pandemııa saldarynan shyǵynǵa batty, satylym 44%-ǵa, 3,3 mlrd eýroǵa deıin tómendedi.
Kompanııanyń habarlaýynsha, toqsandaǵy naqty shyǵyn 409 mıllıon eýrony quraǵan. Inditex dúkenderiniń tórtten bir bóligi qazirge deıin jabyq boldy.
Degenmen, Inditex-tyń onlaın-saýdasy toqsan ishinde 50%-ǵa, sáýirde jyldyq esepteý boıynsha 95%-ǵa artqan.
