Zapastaǵy áskerı mindettiler Astanada jaýyngerlik daıarlyqtan ótip jatyr
ASTANA. KAZINFORM — Elordada zapastaǵy áskerı mindetti azamattardyń qatysýymen josparly on kúndik oqý-jattyǵý jıyndary bastaldy. Oǵan 100-den astam azamat shaqyrylǵan.
Búginde jıynǵa qatysýshylardyń basym bóligi azamattyq salada eńbek etedi. Olardyń qatarynda ınjenerler, dárigerler, muǵalimder, memlekettik qyzmetshiler, kásipkerler jáne basqa da mamandyq ıeleri bar. Áskerı jıyndar olardyń jaýyngerlik daıarlyǵyn saqtaýǵa jáne qajet bolǵan jaǵdaıda jumyldyrý rezerviniń mindetterdi oryndaýǵa daıyndyǵyn qamtamasyz etýge múmkindik beredi.
Jıyn barysynda bólimshelerdiń úılesimdi áreket etýine, komandırlerdiń sheshim qabyldaý qabiletine jáne shynaıy jaǵdaılarǵa barynsha jaqyn ortada is-qımyl jasaýǵa erekshe kóńil bólinedi.
– Áskerı jıyn burynǵy daǵdylardy jańǵyrtýǵa, zamanaýı daıyndyq ádisterin meńgerýge jáne el qaýipsizdigi aldyndaǵy jaýapkershilikti qaıta sezinýge kómektesedi. Biz zamanaýı qarý-jaraq pen tehnıkany qoldanýdan tájirıbe jınadyq. Eń bastysy – komandalyq jumystyń jáne ózara kómektiń mańyzdylyǵyna kóz jetkizdik, – dedi Qazaqstan Respýblıkasy Atom energııasy agenttiginiń memlekettik qyzmetshisi, zapastaǵy qatardaǵy jaýynger Marat Aıtqoja.
99255 áskerı bólim komandıriniń tárbıe jáne ıdeologııalyq jumystar jónindegi orynbasary podpolkovnık Erkebulan Ábijovtiń aıtýynsha, jumyldyrý rezervin daıarlaý eldiń áskerı qaýipsizdigin qamtamasyz etýdiń mańyzdy baǵyttarynyń biri bolyp qala beredi.
– Áskerı jıyn áskerı mindetti azamattardyń daıyndyǵyn saqtaýǵa jáne qoǵam men armııa arasyndaǵy baılanysty nyǵaıtýǵa múmkindik beredi. Senimdi jumyldyrý rezervi – memlekettiń qorǵanys qabiletiniń mańyzdy quramdas bóligi, – dedi ol.
Biliktilikti arttyrý kezeńinde jıynǵa qatysýshylar saptyq, taktıkalyq, atys jáne arnaıy daıyndyq boıynsha praktıkalyq daǵdylaryn qaıta pysyqtaıdy. Sonymen qatar bólimshe quramynda áreket etý, memlekettik organdarmen ózara is-qımyl jasaý jáne aýmaqtyq qorǵanys mindetterin oryndaý máseleleri boıynsha jattyǵýlar ótkizedi.
Aıta ketelik áskerı IT-mamandar daıarlaıtyn ınstıtýtqa qujat qabyldaý bastaldy.
