Zańsyz jumys istegen qostanaılyq kosmetolog sotta jaýap berdi
QOSTANAI. QazAqparat – Qostanaı oblysynda farmatsevtıka qyzmetimen zańsyz aınalysqan áıelge qatysty sot isi qaraldy, dep habarlaıdy QazAqparat.
Oblystyq taýarlar men kórsetiletin qyzmetterdiń sapasy jáne qaýipsizdigin baqylaý departamentiniń baspasóz qyzmeti málimet etkendeı, Qostanaı turǵyny byltyr kosmetolog jumysymen zańsyz aınalysyp kelgen. Alaıda ol «Meıirbıke isi» mamandyǵyn bitirgen. Soǵan qaramastan kosmetolog qyzmetine turyp, kelýshilerge dárigerlik protsedýralar júrgizgen.
«Departament 45 jastaǵy áıeldiń shaǵymy boıynsha tekserý júrgizdi. Anyqtalǵandaı, medbıke 2019 jyldyń mamyr aıynan qarasha aıyna deıin qala salondarynyń birinde kosmetolog qyzmetin atqarǵan. «Kosmetolog» terini tegisteıtin jáne ájimderdi joıatyn ınektsııa salyp kelgen. Biraq birneshe ýaqyttan soń sulýlyq salony kelýshisinde asqynýlar paıda bolǵan. Júrgizilgen tekserý barysynda birqatar zań buzýshylyqtar anyqtaldy. Ol memlekettik lıtsenzııasyz zańsyz medıtsınalyq qyzmetti júzege asyrǵan, sondaı-aq onyń klınıkalyq praktıka mamanyna beriletin sertıfıkaty bolmaǵan», - deıdi departament basshysynyń orynbasary Janat Shoqym.
Sanıtarlyq erejelerge sáıkes emdik-kosmetologııalyq protsedýralardy dermatolog-dáriger oryndaýy tıis. Zań boıynsha meıirbıkege tıesili jumystar dárigerdiń taǵaıyndaýymen, baqylaýymen jáne basshylyǵymen júzege asyrylady.
Departament «kosmetologqa» zańsyz medıtsınalyq jáne farmatsevtıkalyq qyzmeti úshin ákimshilik jaza belgilegen. Alaıda ol departament sheshimine qarsy shyǵyp, sot aldyna bardy. Sot zań buzǵan áıeldi kináli dep tanyp, aıyppul tóleý týraly úkim kesti.
