«Zańsyz jolmen alynǵan kirister» uǵymy «qylmystyq jolmen alynǵan kirister» degen anyqtamaǵa aýystyrylady - R.Ahmetov
ASTANA. QazAqpart - Búgin QR Parlamenti Senaty otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» QR Zańynyń jobasy birinshi oqylymda maquldandy.
QR Parlamenti Senaty Qarjy jáne bıýdjet komıtetiniń tóraǵasy R.Ahmetovtiń atap ótýinshe, atalǵan zań jobasy qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi eýrazııalyq toptyń 14-shi jalpy otyrysynda qabyldanǵan Qazaqstan Respýblıkasynyń ózara baǵalaý esebiniń ulttyq zańnamany halyqaralyq standarttarǵa jáne aqshany jylystatýǵa jáne terrorızmdi qarjylandyrýǵa qarsy kúrestiń qarjylyq sharalaryn ázirleý toby qabyldaǵan jańartylǵan usynymdarǵa sáıkes keltirý bóligindegi eskertpelerin iske asyrý maqsatynda ázirlengen.
«Zań jobasy otyz úsh zańnamalyq aktige, onyń ishinde alty Kodekske ózgerister men tolyqtyrýlar engizýdi kózdeıdi. Zań jobasymen kózdelgen zańnamalyq aktilerge ózgerister engiziledi, onda «zańsyz jolmen alynǵan kirister» degen uǵym «qylmystyq jolmen alynǵan kirister» degen anyqtamaǵa aýystyrylady», - dedi R.Ahmetov.
Onyń sózine qaraǵanda, Zań jobasy tutastaı alǵanda QR Konstıtýtsııasyna sáıkes keledi, «Normatıvtik quqyqtyq aktiler týraly» QR Zańyna jáne basqa da zańnamalyq aktilerge qaıshy kelmeıdi.
