Zańsyz zeınetaqy rásimdeý arqyly 36 mln teńge urlaǵan sheneýnik ustaldy
Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tergeý departamenti bastyǵynyń orynbasary Baýyrjan Balǵabekov aıtty, dep habarlaıdy QazAqparat tilshisi.
«Sybaılas jemqorlyqqa qarsy is-qımyl bıýrosynyń Pavlodar oblystyq departamenti oblystyq «Zeınetaqy tóleý jónindegi memlekettik ortalyq» RMKK basshysynyń burynǵy orynbasaryna qatysty sotqa deıingi tergeý amaldaryn júrgizip jatyr. Ol ózine baǵynyshty tulǵalar tobymen júıeli túrde oblys turǵyndaryna zeınetaqy tólemderin zańsyz rásimdeý jáne aýdarý arqyly 2006-2014 jyldary jalpy somasy 36,4 mln teńge bolatyn bıýdjet qarajatyn talan-tarajǵa salý kúdigine iligip otyr», - dedi ol.
Onyń sózine qaraǵanda, kúdikti kinásin tolyqtaı moıyndaýyna baılanysty protsessýaldy ustaý sharasy qoldanylǵan joq. Tergeý amaldary júrgizilip jatyr.