Zańsyz syıaqy alǵandar endi 3 jylǵa sottalýy múmkin

ASTANA. QazAqparat – Zańsyz syıaqy alǵandarǵa qatysty qoldanylatyn jaza kúsheıedi. Sybaılas jemqorlyqqa qarsy qyzmet Qylmystyq kodekske osyndaı ózgeris engizýdi usynyp otyr, dep habarlaıdy QazAqparat tilshisi.

«Іri mólsherde syıaqy alýmen baılanysty ne qorqytyp alýmen ushtasqan is-áreketter – múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan 3 jylǵa deıingi merzimge aıyra otyryp, 3 000 AEK-ke (10 350 000 teńgege) deıin aıyppul salýǵa ne sol mólsherde túzeý jumystaryna ne 800 saǵatqa deıingi merzimge qoǵamdyq jumystarǵa tartýǵa ne 3 jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady», - delingen Ashyq NQA portalynda jarııalanǵan Qylmystyq kodekstiń jańa redaktsııasynda.

Aıta keteıik, qoldanystaǵy zań sheńberinde mundaı áreket jasaǵandarǵa eń qatal jaza retinde 2 jylǵa sottaý, osy merzimge bas bostandyǵyn shekteý nemese 6 mln 900 myń teńge aıyppul salý sharalary qoldanylady. Sondaı-aq kináli dep tanylǵan adam sot sheshimimen 600 saǵatqa qoǵamdyq jumystarǵa tartylady. Endi zańsyz syıaqy alǵandarǵa 3 jylǵa bas bostandyǵynan aıyrý, 10 mln teńgeden asa aıyppul salý jáne 3 jylǵa jylǵa bostandyǵyn shekteý jazasy qoldanylmaq.

Qujat 17 shildege deıin kópshilik talqylaýda bolady.