Zańsyz shyǵarylǵan aktıvterdi qaıtarý zańy Nazarbaevtyń otbasy múshelerine qoldanyla ma

ASTANA. QazAqparat – Bas prokýrordyń orynbasary Ulan Baıjanov burynǵy prezıdent Nursultan Nazarbaevtyń otbasy músheleriniń sheteldegi múlkin izdeý múmkindigine qatysty suraqqa jaýap berdi, dep habarlaıdy QazAqparat tilshisi.

«Zańda («Zańsyz ıemdelgen aktıvterdi memleketke qaıtarý týraly») sýbektilerge qatysty ólshemshart naqty aıqyndalǵan. Eger siz ataǵan famılııa, bul otbasynyń músheleri osy ólshemsharttarǵa kiretin bolsa, onda mindetti túrde zań talaptary olarǵa qatysty qoldanylady», - dedi Ulan Baıjanov Senattyń jalpy otyrysynan keıin tilshiler suraǵyna jaýap bere otyryp.

Budan buryn habarlanǵandaı, búgin Senattyń jalpy otyrysynda palata depýtattary «Zańsyz ıemdelgen aktıvterdi memleketke qaıtarý týraly» Zańdy maquldady.

Zańda aktıvterdi qaıtarýdyń erikti nemese májbúrli tártibi kózdelgen.

Zańnyń negizgi maqsaty – Qazaqstan Respýblıkasynyń aýmaǵynda da, odan tys jerlerde de zańsyz ıemdelgen aktıvterdi qaıtarý úshin zańnamalyq parametrlerdi aıqyndaý, sondaı-aq olardy zańsyz ıemdenýge jáne shyǵarýǵa yqpal etken jaǵdaılardy joıý.

Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń málimetine qaraǵanda, qujat aıasynda aktıvterdi shyǵarý salasyndaǵy quqyq buzý derekterin anyqtaý, jolyn kesý, ashý jáne tergep-tekserý, aktıvterdi qaıtarý jónindegi halyqaralyq-quqyqtyq yntymaqtastyqty damytý, qaıtarylǵan qarajatty qoǵamnyń ıgiligi úshin tıimdi paıdalaný, ekonomıkalyq resýrstardyń zańsyz shoǵyrlanýyna, aktıvterdi zańsyz shyǵarýǵa yqpal etken sebepter men jaǵdaılardy anyqtaý eskerilgen.

Bas prokýratýranyń qurylymynda zańsyz shyǵarylǵan aktıvterdi qaıtarý jónindegi jeke vedomstvo qurylady.

Ol osy saladaǵy ýákiletti organnyń fýnktsııalaryn oryndaıdy.

Zańsyz shyǵarylǵan aktıvterdi qaıtarýy tıis adamdardyń tizimi qyrkúıek aıynda belgili bolady.